சர்வதேச அளவில் இஸ்ரேல் தனித்து விடப்படவில்லை என்றும், வலிமைமிக்க நாடான இந்தியாவுடன் சிறப்பான நல்லுறவு பேணப்பட்டு வருவதாகவும் இஸ்ரேல் பிரதமர் பெஞ்சமின் நெதன்யாகு தெரிவித்துள்ளார்.
இஸ்ரேல் தலைநகர் ஜெருசலேமில் நடைபெற்ற அரச விழாவில் பாதுகாப்பு கோட்பாடு குறித்த அறிக்கையை வெளியிட்டுப் பேசியபோதே அவர் இதனைக் குறிப்பிட்டார்.
அமெரிக்க ஜனாதிபதி டொனால்ட் ட்ரம்பின் பதவிக்காலம் இன்னும் 2 ஆண்டுகள் மட்டுமே உள்ள நிலையில், அந்தக் காலக்கட்டத்தை முழுமையாகப் பயன்படுத்தி இஸ்ரேலை நாம் பலப்படுத்திக் கொள்ள வேண்டும் என நெதன்யாகு தெரிவித்தார்.
பிற நாடுகளுடன் புதிய கூட்டணிகளை ஏற்படுத்தி, மற்ற நாடுகள் மதிக்கும் அளவுக்கு நாட்டின் பலத்தை உயர்த்த வேண்டியதன் அவசியத்தை அவர் வலியுறுத்தினார்.
இந்தியா எந்த வகையிலும் சிறிய நாடு அல்ல எனக் குறிப்பிட்ட அவர், உலகின் மிகப்பெரிய சக்தி வாய்ந்த நாடான இந்தியாவுடன் இஸ்ரேலுக்குச் சிறப்பு வாய்ந்த நல்லுறவு உள்ளதாகத் தெரிவித்தார்.
இந்திய மக்களின் மனதில் இஸ்ரேல் மீது தனி அன்பு உள்ளதாகவும், இதனால் சர்வதேச அரங்கில் இஸ்ரேல் தனித்து விடப்படவில்லை என்பதை இதன் மூலம் தாம் உணர்வதாகவும் நெதன்யாகு பெருமிதத்துடன் குறிப்பிட்டார்.
