சிங்கள பௌத்த சமூகத்தின் மீது அரசு மேற்கொண்டுவரும் மறைமுகத் தாக்குதல்களுக்கு எதிராக மகா சங்கத்தினர் அனைவரும் அரசியல் பேதங்களைக் கடந்து ஒன்றிணைய வேண்டும் என்று ஐக்கிய மக்கள் சக்தியின் தெல்தெனிய தொகுதி அமைப்பாளர் மகேஷ் சேனாநாயக்க கோரிக்கை விடுத்தார்.
எதுல்கோட்டேயிலுள்ள கட்சியின் தலைமை அலுவலகத்தில் இன்று நடைபெற்ற ஊடகவியலாளர் சந்திப்பில் கலந்துகொண்டு உரையாற்றியபோதே அவர் மேற்கண்டவாறு தெரிவித்தார்.
அவர் மேலும் உரையாற்றுகையில்,
“வணக்கத்துக்குரிய கலகொடஅத்தே ஞானசார தேரர் நீதிமன்றத்துக்கு அழைத்துச் செல்லப்பட்ட விதம் மற்றும் அவரது காவி உடை அகற்றப்பட்டமை என்பன பௌத்த சமூகத்தின் மீதான நேரடித் தாக்குதலாகும். காவி உடை என்பது நாட்டின் அடையாளம் என்பதால், அதற்கு உரிய மதிப்பளிக்கப்பட வேண்டும்.
தற்போதைய அரசுக்கு வாக்களித்த பெரும்பான்மையான இடதுசாரி மற்றும் தேசியவாத சிங்கள பௌத்த மக்கள் இன்று ஏமாற்றமடைந்துள்ளனர். அரசு பல்வேறு தரப்பினரைப் பயன்படுத்தி பௌத்த சமூகத்தின் உரிமைகள் மற்றும் நம்பிக்கைகள் மீது மறைமுகத் தாக்குதல்களை நடத்தி வருகின்றது.
பௌத்த மதத்துக்குப் பாதிப்பு ஏற்படும் இந்தச் சந்தர்ப்பத்தில், மகா சங்கத்தினர் தங்களுக்குள்ள அரசியல் கருத்து வேறுபாடுகளைப் புறந்தள்ளி, பௌத்த சமூகத்தைப் பாதுகாக்க ஒன்றுபட்டு அணிதிரள வேண்டும்.
மக்கள் நம்பிக்கைகள் மீது தாக்குதல் நடத்தப்பட்டால் மக்களின் கொந்தளிப்பை யாராலும் தடுக்க முடியாது.” – என்றார்.
