மத்திய மாகாண கண்டி மாவட்டத்தில் உள்ள ஹோப் தோட்ட வைத்தியசாலை, JEDB – ஹேவாஹெட்டையில் அத்தியாவசிய மருத்துவ சேவைகளை மீளமைக்குமாறு அவசரக் கோரிக்கை விடுத்துள்ளனர்.
இது குறித்து அப் பகுதியில் உள்ள மக்கள் நாட்டின் தலைவரான அதி மேதகு ஜனாதிபதி அநுரகுமார திசாநாயக்க மற்றும் சுகாதார அமைச்சர் அவர்கள் கவனத்திற்கு கொண்டு வந்தனர்.
ஹோப் தோட்டம், JEDB, ஹேவாஹெட்டையைச் சேர்ந்த தோட்ட சமூகத்தின் சார்பாகவும், தோட்டத்தின் நான்கு பிரிவுகளைச் சேர்ந்த குடியிருப்பாளர்களின் கையொப்பங்களுடனும், ஹேப்தோட்ட வைத்தியசாலையில் ஏற்பட்டுள்ள மருத்துவ சேவைகளின் தீவிர வீழ்ச்சி தொடர்பாக தங்களின் அவசர கோரிக்கைகளை முன்வைத்துள்ளனர்.
ஹோப் தோட்டம் நான்கு பிரிவுகளைக் கொண்டதுடன், தோட்டத் தொழிலாளர்கள், அவர்களின் குடும்பத்தினர், முதியோர், பெண்கள் மற்றும் குழந்தைகள் உட்பட சுமார் 2,000 பேரைக் கொண்ட தோட்ட சமூகத்திற்கு சேவை வழங்குகிறது.
பல ஆண்டுகளாக, ஹோப்தோட்ட வைத்தியசாலை இச்சமூகத்திற்கு முக்கியமான சுகாதார சேவையை வழங்கி வந்தது. முன்னர், இவ்வைத்தியசாலையில் மகப்பேற்று விடுதி, மருத்துவ அதிகாரி, தாதியர் மற்றும் ஏனைய மருத்துவப் பணியாளர்கள், அம்புலன்ஸ் வசதி, தேவையான மருத்துவ உபகரணங்கள் மற்றும் பிற அத்தியாவசிய சுகாதார சேவைகள் இருந்தன.
துரதிர்ஷ்டவசமாக, தற்போது இவ்வைத்தியசாலையின் மருத்துவ சேவைகள் பெருமளவில் வீழ்ச்சியடைந்துள்ளன.
தற்போது, மகப்பேற்று சேவை மட்டுமே வரையறுக்கப்பட்ட அளவில் இயங்கி வருகின்றது.
ஏனைய அத்தியாவசிய மருத்துவ சேவைகள் கிடைக்காத நிலையிலோ அல்லது மிகவும் போதாமையான நிலையிலோ உள்ளன.
இந்த நிலைமை அத் தோட்ட நான்கு பிரிவுகளில் வாழும் தோட்ட சமூகத்திற்கு பெரும் சிரமத்தை ஏற்படுத்தியுள்ளது.
அடிப்படை சிகிச்சைக்காகக் கூட குடியிருப்பாளர்கள் பிற வைத்தியசாலைகள் அல்லது மருத்துவ நிலையங்களுக்கு செல்ல வேண்டிய கட்டாயத்தில் உள்ளனர். குறிப்பாக முதியோர், குழந்தைகள், கர்ப்பிணித் தாய்மார்கள், நோயாளிகள் மற்றும் குறைந்த வருமானம் கொண்ட குடும்பங்களுக்கு இது மிகவும் கடினமானதாகும்.
சுமார் 2,000 பேர் வசிக்கும் ஒரு சமூகத்திற்கு முறையாக இயங்கும் அடிப்படை மருத்துவ வசதி இல்லாத நிலை ஏற்படக் கூடாது.
எனவே, தோட்ட சமூகத்தின் கவலைகளை பிரதிநிதித்துவப்படுத்தும் புதிய தொழிலாளர் முன்னணியின் செயலாளர் முரளி ரகுநாதன் ஜனாதிபதி மற்றும் கௌரவ அமைச்சர் ஆகியோரின் கவனத்திற்கு கொண்டு சென்றுள்ளார்.
ஹோப்தோட்ட வைத்தியசாலையை உடனடியாக ஆய்வு செய்து, அதன் தற்போதைய நிலைமை மற்றும் மருத்துவத் தேவைகளை மதிப்பீடு செய்தல்.
தோட்ட சமூகத்திற்கான வழக்கமான வெளிநோயாளர் மற்றும் அத்தியாவசிய மருத்துவ சேவைகளை மீளமைத்தல்.
ஆரம்ப காலத்தில் இருந்தது போல வழக்கமான அடிப்படையில் தகுதியான மருத்துவ அதிகாரி/மருத்துவரை நியமித்தல்.
போதுமான தாதியர், மருத்துவ மற்றும் உதவி பணியாளர்களை நியமித்தல்.
மருத்துவ அவசரநிலைகளுக்காக முறையாக இயங்கும் அம்புலன்ஸ் சேவையை மீளமைத்தல் அல்லது வழங்குதல்.
போதுமான அத்தியாவசிய மருந்துகள், மருத்துவ உபகரணங்கள் மற்றும் தேவையான பிற வசதிகளை வழங்குதல்.
தற்போதுள்ள மகப்பேற்று மற்றும் தாய்மை சுகாதார சேவைகளை வலுப்படுத்துதல்.
ஹேப் தோட்டத்தின் நான்கு பிரிவுகளுக்கும் வழக்கமானதும் நம்பகமானதுமான மருத்துவ சேவை அட்டவணையை ஏற்படுத்துதல்.
வைத்தியசாலை மற்றும் அதன் வசதிகளின் முறையான பராமரிப்பு மற்றும் நிர்வாகத்தை உறுதி செய்தல்.
ஹேப் தோட்டத்தில் வசிக்கும் சுமார் 2,000 பேரின் சுகாதாரத் தேவைகளை கருத்தில் கொண்டு, வைத்தியசாலையை முறையாக இயங்கும் சமூக மருத்துவ நிலையமாக மீளமைக்க உரிய நடவடிக்கைகளை மேற்கொள்ளுதல்.
இவ்விடயத்தை அவசரமானதும் மனிதாபிமானமானதுமான விடயமாக கருதி, சம்பந்தப்பட்ட சுகாதார அதிகாரிகள் நிலைமையை விசாரித்து, தாமதமின்றி உரிய திருத்த நடவடிக்கைகளை மேற்கொள்ளுமாறு ஏற்பாடு செய்யுமாறு மேதகு ஜனாதிபதி அவர்களையும் கௌரவ அமைச்சரையும் வினயமாக கேட்டு கொண்டுள்ளார்.
இச்சமூகத்தினர் முன்னர் பெற்றுவந்த அத்தியாவசிய சுகாதார சேவைகளை அரசாங்கம் மீள வழங்கும் எனும் உண்மையான நம்பிக்கையுடன், பாதிக்கப்பட்ட தோட்ட சமூகத்தின் கையொப்பங்களுடன் இம்மனு சமர்ப்பிக்கப்படுகிறது.
தங்களின் அவசரமானதுமான துரித தலையீட்டை கோருகின்றோம் என குறிப்பிடப்பட்டுள்ளது.
