அநுர அரசுடன் எமக்கு எந்தவித அரசியல் உடன்பாடும் கிடையாது! : ஹர்ஷன ராஜகருண எம்.பி தெரிவிப்பு

தேசிய மக்கள் சக்தி அரசுடன் ஐக்கிய மக்கள் சக்திக்கு எவ்வித அரசியல் உடன்பாடும் (டீல்) கிடையாது எனத் தெரிவித்த அந்தக் கட்சியின் நாடாளுமன்ற உறுப்பினர் ஹர்ஷன ராஜகருண, பிரதான எதிர்க்கட்சிக்குரிய பொறுப்பைத் தம்மால் இயன்றளவு சரியாக நிறைவேற்றி வருவதாகவும் குறிப்பிட்டார்.

இது தொடர்பில் ஊடகங்களிடம் அவர் மேலும் தெரிவிக்கையில்,

“இந்த அரசை மாற்ற வேண்டும் என்ற நிலைக்கு மக்கள் இன்று வந்துவிட்டனர். பிரதான எதிர்க்கட்சிக்குரிய பொறுப்பை ஐக்கிய மக்கள் சக்தி தம்மால் முடிந்த அளவுக்குச் சிறப்பாகச் செய்து வருகின்றது.

அரசமைப்பின் 22 ஆவது திருத்தச் சட்டமூலம் உட்பட அனைத்து விடயங்களிலும் நாம் பொறுப்புடன் செயற்பட்டுள்ளோம்.

இந்த அரசிடம் மூன்றிலிரண்டு பெரும்பான்மை பலம் இருப்பதால், நாடாளுமன்றத்தில் எண்ணிக்கை ரீதியில் சவால் கொடுப்பது கடினமாகும். எனினும், இணைந்து பயணிக்கக் கூடிய விடயங்களில் அனைத்து எதிரணிகளுடனும் நாம் ஒன்றிணைந்து பணியாற்றி வருகின்றோம். அதற்காகத் தேர்தலில் ஒன்றிணைந்து போட்டியிட வேண்டிய அவசியம் இல்லை.

நாம் இந்த அரசுக்கு அஞ்சவில்லை. அரசுடன் எங்களுக்கு எந்தவிதமான ‘டீலும்’ இல்லை. பிரதான எதிர்க்கட்சி என்ற வகையில் எமது பொறுப்பைச் சரிவர நிறைவேற்றுவோம். மேலும், ஐக்கிய மக்கள் சக்தியும், ஐக்கிய தேசியக் கட்சியும் எதிர்காலத்தில் ஒன்றிணையும்.” – என்றார்.