களவு நகை தொடர்பிலான விசாரணை ஒன்றின் போது, பொலிஸாருக்கு மொழிபெயர்த்து உதவ முயன்ற இளைஞன் ஒருவர் பொலிஸாரால் தாக்கப்பட்டதில் பலத்த காயமடைந்து மயக்கமடைந்த நிலையில் வைத்தியசாலையில் அனுமதிக்கப்பட்டுள்ளார்.
இன்று (24) இடம்பெற்ற இச்சம்பவம் குறித்து தெரியவருவதாவது,
கொழும்பு 11, செட்டியார் தெரு பகுதியில் களவு நகை தொடர்பான விசாரணைக்காக பொலிஸார் வருகை தந்திருந்த வேளையில், மொழிப் பிரச்சினை காரணமாக விசாரணை நடவடிக்கைகளை இரு தரப்பினருக்கும் புரிய வைப்பதற்காக ‘இலக்கம் 152ஐச் சேர்ந்த ஜீவா’ என்பவர் பொலிஸாருக்கு விளக்கிப் பேச முயன்றுள்ளார்.
இதன்போது, எந்தவித நியாயமான காரணமுமின்றி ஆத்திரமடைந்த மூன்று பொலிஸார் இணைந்து, ஜீவாவை மிகக் கொடூரமாகத் தாக்கியுள்ளனர்.
பொலிஸாரின் இத் தாக்குதலில் காயமடைந்த அவர், சம்பவ இடத்திலேயே மயக்கமடைந்து விழுந்துள்ளார்.
இதனைத் தொடர்ந்து, அருகிலிருந்தவர்கள் உடனடியாக அவரை அவசர சிகிச்சைகளுக்காக வைத்தியசாலையில் அனுமதித்தனர்.
பொதுமக்களுக்குச் சட்டத்தின் வழியில் உதவ முன்வந்த இளைஞன் மீது பொலிஸார் மேற்கொண்ட இத்தாக்குதலைக் கண்டித்து அங்கு பொதுமக்கள் மற்றும் செட்டியார் தெரு நகை வியாபாரிகள் ஒன்று கூடி போராட்டத்தில் ஈடுபட்டதால், செட்டியார் தெரு பகுதியில் போக்குவரத்து நெரிசல் ஏற்பட்டது.
இதேவேளை, சம்பவ இடத்திற்கு விரைந்து வந்த புறக்கோட்டை பொலிஸ் நிலைய பொறுப்பதிகாரி நிலைமையைச் சீராக்கியதோடு, தாக்குதலில் ஈடுபட்ட பொலிஸார் மீது உடனடியாக நடவடிக்கை எடுப்பதாக உறுதியளித்தார்.
அவரது உறுதிமொழியைத் தொடர்ந்து அங்கு கூடியிருந்தவர்கள் கலைந்து சென்றதோடு, செட்டியார் தெரு போக்குவரத்தும் சீர் செய்யப்பட்டது.
இச்சம்பவம் தொடர்பான மேலதிக விசாரணைகள் துரிதமாக நடைபெறுமென பொலிஸார் தெரிவித்தனர்.
