ரோயல் சேலஞ்சர்ஸ் பெங்களூருவை 9 ஓட்டங்களால் வீழ்த்திய லக்னோ சூப்பர் ஜெயண்ட்ஸ்!

பாரத ரத்னா ஸ்ரீ அடல் பிஹாரி வாஜ்பாய் ஏகானா கிரிக்கெட் மைதானத்தில் நேற்றிரவு 07 ஆம் திகதி மழையால் பாதிக்கப்பட்ட 2026 இந்தியன் பிரீமியர் லீக் தொடரின் 50 ஆவது போட்டியில் லக்னோ சூப்பர் ஜெயண்ட்ஸ் அணி, ரோயல் சேலஞ்சர்ஸ் பெங்களூரு அணியை 9 ஓட்டங்கள் (DLS முறைப்படி) வித்தியாசத்தில் வீழ்த்தியது.

இரு அணிகளுக்கும் தலா 19 ஓவர்களாகக் குறைக்கப்பட்ட இந்த ஆட்டத்தில், மிட்செல் மார்ஷின் அதிரடியான சதம் லக்னோ அணிக்கு ஒரு பிரம்மாண்டமான ஓட்ட எண்ணிக்கயை குவிக்க அடித்தளத்தை அமைத்தது.

நேற்றிரவு 07.30 மணிக்கு ஆரம்பமன இப் போட்டியில் நாணய சுழற்சியில் வெற்றி பெற்ற பெங்களூரு அணி பந்து வீச்சினை தேர்வு செய்தது. அதன்படி, முதலில் துடுப்பாட்டம் செய்ய அழைக்கப்பட்ட லக்னோ சூப்பர் ஜெயண்ட்ஸ் அணி, தொடக்கத்திலிருந்தே ஆதிக்கம் செலுத்தியது.

மிட்செல் மார்ஷ் தனது கிரிக்கெட் வாழ்க்கையை வரையறுக்கும் ஒரு இன்னிங்ஸை ஆடி, 56 பந்துகளில் 8 பவுண்டரிகள் மற்றும் 9 சிக்ஸர்களுடன் 111 ஓட்டங்களை விளாசினார்.

அவர் அர்ஷின் குல்கர்னியுடன் (17) இணைந்து 95 ஓட்டங்கள் என்ற நிலையான தொடக்கக் கூட்டணியை அமைத்த பின்னர், மிடில் ஓவர்களில் அதிரடியாக ஓட்டங்களை குவித்தார். அவரை அடுத்து நிக்கோலஸ் பூரன் 23 பந்துகளில் 38 ஓட்டங்கள் எடுத்து அதிரடியாக ஆடி இரண்டாவது உத்வேகத்தை அளித்தார்.

அதேநேரத்தில், அணித் தலைவர் ரிஷப் பந்த் 10 பந்துகளில் 320.00 ஸ்டிரைக் ரேட்டில் ஆட்டமிழக்காமல் 32 ஓட்டங்கள் எடுத்து இன்னிங்ஸை நிறைவு செய்தார். இதனால், நிர்ணயிக்கப்பட்ட 19 ஓவர்கள் நிறைவில் லக்னோ அணியானது மூன்று விக்கெட் இழப்புக்கு 209 ஓட்டங்களை குவித்தது.

பின்னர் சேஸிங்கில் பெங்களூரு அணி மோசமான தொடக்கத்தைப் பெற்றது. மொஹமட் ஷமியின் முதல் ஓவரில் ஜேக்கப் பெத்தேல் ஆட்டமிழக்க இரண்டாவது ஓவரின் இரண்டாவது பந்து வீச்சில் விராட் கோலி எதுவித ஓட்டமின்றி பிரின்ஸ் யாதவ்வின் பந்து வீச்சில் போல்ட் முறையில் ஆட்டமிழந்தார்.

இதனால் பெங்களூ அணி 9/2 என்ற நிலையில் தடுமாறியது. பின்னர் அணித் தலைவர் ரஜத் பட்டிதார் 31 பந்துகளில் 61 ஓட்டங்களை குவித்து பெங்களூருவை போட்டியில் தக்கவைத்துக் கொண்டார். அவருக்கு தேவ்தத் படிக்கல் 34 ஓட்டங்கள் எடுத்து சிறந்த பங்களிப்பினை வழங்கினார்.

அவர்களை அடுத்து டிம் டேவிட் (17 பந்துகளில் 40 ஓட்டம்), க்ருணால் பாண்டியா (16 பந்துகளில் 28 ஓட்டம்) மற்றும் ரொமாரியோ ஷெப்பர்ட் (15 பந்துகளில் 23 ஓட்டம்) ஆகியோர் அணியை வெற்றிக்காக அழைத்துச் செல்லப் போராடினர். இருப்பினும் இறுதியாக பெங்களூரு அணி 19 ஓவர்களில் 6 விக்கெட் இழப்புக்கு 203 ஓட்டங்கள‍ை எடுத்தது.

போட்டியின் ஆட்டநாயகனாக மிட்செல் மார்ஷ் தெரிவானார். ரஜத் பதிதார் மற்றும் டிம் டேவிட் ஆகியோரின் மிடில் ஆர்டர் அதிரடியையும் மீறி, பிரின்ஸ் யாதவின் ஹாட்ரிக் தலைமையிலான LSG பந்துவீச்சுப் பிரிவு நிதானத்தைக் கடைப்பிடித்து, லீக்கின் பலம் வாய்ந்த அணியை வீழ்த்தியது.