புளியங்குளம் வைத்தியசாலையை பார்வையிட்ட சத்தியலிங்கம் எம்பி ; தேவைப்பாடுகள் தொடர்பில் நேரில் ஆய்வு.
வவுனியா புளியங்குளம் பிரதேச வைத்தியசாலைக்கு இலங்கைத் தமிழ் அரசுக் கட்சியின் பாராளுமன்ற உறுப்பினர் மருத்துவர் ப.சத்தியலிங்கம் அவர்கள் நேற்று ஏப்ரல் 04 ஆம் திகதி களவிஜயம் ஒன்றினை மேற்கொண்டிருந்தார். வைத்தியசாலை சமூகத்தின் கோரிக்கையின் பிரகாரம் இந்த விஜயம் இடம்பெற்றிருந்தது.
இதன்போது வைத்தியசாலையின் உடனடியான தேவைப்பாடுகள், முக்கிய பிரச்சினைகள் தொடர்பில் வைத்தியசாலையின் பொறுப்பு வைத்திய அதிகாரி, உத்தியோகத்தர்கள், ஊழியர்கள் மற்றும் வைத்தியசாலை சமூகத்தினருடன் கலந்துரையாடி கேட்டறிந்துகொண்டார். மேலும் வைத்தியசாலையில் மேற்கொள்ளப்படவேண்டிய உடனடியான திருத்தவேலைகள் தொடர்பிலும் இதன்போது பாராளுமன்ற உறுப்பினருக்கு தெரியப்படுத்தப்பட்டது.
உடனடியாக செய்துமுடிக்கக்கூடிய விடயங்கள் தொடர்பில் உரிய தரப்பினரை தொடர்புகொண்டு அறிவுறுத்திய பாராளுமன்ற உறுப்பினர், ஏனைய விடயங்கள் தொடர்பில் அமைச்சுமட்ட கவனத்திற்கு கொண்டுசென்று தீர்வினை பெற்றுத்தருவதாக குறிப்பிட்டிருந்தார்.
இவ்விஜயத்தின்போது வவுனியா வடக்கு பிரதேசசபை தவிசாளர் தி.கிருஸ்ணவேணி, பிரதேசசபை உறுப்பினர்களான செ.சுசீலன், த.தனுசன், க.சரோஜாதேவி, பாராளுமன்ற உறுப்பினரின் வவுனியா வடக்கு பிரதேச இணைப்பாளர் தவேந்திரராசா (அமலன்) ஆகியோரும் இணைந்திருந்தமை குறிப்பிடத்தக்கது.
