மெக்ஸ்வெல்லின் சகாப்தம் முடிவுக்கு வருகிறதா? அவுஸ்திரேலியா எடுத்த அதிரடி முடிவு!

2026-2027 ஆம் ஆண்டிற்கான கிரிக்கெட் அவுஸ்திரேலியாவின் (Cricket Australia) 21 வீரர்கள் அடங்கிய தேசிய ஒப்பந்தப் பட்டியல் இன்று வெளியிடப்பட்டது.

இதில் அதிரடி வீரரான ” கிளென் மெக்ஸ்வெல்” மற்றும் இளம் தொடக்க வீரர் ”சேம் கோன்ஸ்டாஸ்” ஆகியோர் நீக்கப்பட்டுள்ளனர்.

எதிர்வரும் ஓகஸ்ட் மாதம் முதல் அடுத்த 12 மாதங்களில் அவுஸ்திரேலிய அணி 20 டெஸ்ட் போட்டிகளில் விளையாட உள்ளது.

இந்த டெஸ்ட் போட்டிகளை மையமாகக் கொண்ட அட்டவணையைக் கருத்தில்கொண்டு, சேம் கோன்ஸ்டாஸிற்கு பதிலாக, 31 வயதான ஜேக் வெதரால்ட் சேர்க்கப்பட்டுள்ளார்.

டெஸ்ட் போட்டிகளுக்கு அதிக முக்கியத்துவம் அளிக்கப்படுவதால், ஒருநாள் மற்றும் டி20 போட்டிகளில் சிறந்து விளங்கும் கிளென் மேக்ஸ்வெல் மற்றும் மேட் ஷார்ட் ஆகியோர் ஒப்பந்தத்திலிருந்து விடுவிக்கப்பட்டுள்ளனர்.

சர்வதேச போட்டிகளிலிருந்து ஓய்வு பெற்ற தொடக்க வீரர் உஸ்மான் கவாஜா மற்றும் காயத்தால் அவதிப்படும் வேகப்பந்து வீச்சாளர் லான்ஸ் மோரிஸ் ஆகியோரின் பெயர்களும் பட்டியலில் இடம்பெறவில்லை.

இரண்டு முறை ஒருநாள் உலகக் கிண்ணம் மற்றும் ஒருமுறை டி20 உலகக் கிண்ணம் வென்று கொடுத்துள்ள 37 வயதான மெக்ஸ்வெல்லின் கிரிக்கெட் எதிர்காலம் குறித்து இந்த முடிவு பெரும் கேள்விகளை எழுப்பியுள்ளது.

அவுஸ்திரேலிய அணியின் மூத்த வேகப்பந்து வீச்சாளர்களான மிட்செல் ஸ்டார்க், ஜோஷ் ஹேசில்வுட் மற்றும் ஸ்கொட் போலண்ட் ஆகியோருக்குப் பின் அணியில் நீடிப்பார் என எதிர்பார்க்கப்பட்டு ”ஜை ரிச்சர்ட்சன்” நீக்கப்பட்டது, ஆச்சரியத்தை ஏற்படுத்தியுள்ளது.

அவருக்குப் பதிலாக Ashes தொடரில் சிறப்பாக செயற்பட்ட 31 வயதான ”பிரெண்டன் டோகெட்” மற்றும் 36 வயதான மைக்கேல் நேசர் ஆகியோருக்கு வாய்ப்பு அளிக்கப்பட்டுள்ளது.

தேர்வுக் குழுத் தலைவர் ஜோர்ஜ் பெய்லி கூறுகையில், “அடுத்த 12 மாதங்கள் பல்வேறு சவால்களைக் கொண்ட டெஸ்ட் தொடர்களை எதிர்கொள்ளவுள்ளோம், அதனால் தான் டெஸ்ட் மற்றும் அனைத்து வடிவ போட்டிகளிலும் விளையாடக்கூடிய வீரர்களுக்கு முன்னுரிமை அளிக்கப்பட்டுள்ளது,” என குறிப்பிட்டுள்ளார்.