செம்மணி அறிக்கை பச்சைப் பொய்! : பேராசிரியர் ராஜ் சோமதேவவின் குழுவுக்கு மக்கள் செயல் அமைப்பு கடுமையான எதிர்ப்பு
பேராசிரியர் ராஜ் சோமதேவ தலைமையிலான தடவியல் தொல்லியல் அகழாய்வு குழுவினால் வெளியிடப்பட்டுள்ள செம்மணி சித்துப்பாத்தி மனிதப் புதைகுழி தொடர்பான இடைக்கால அறிக்கையை முழுமையாக நிராகரிப்பதாகவும், அதனை வன்மையாகக் கண்டிப்பதாகவும் மக்கள் செயல் அமைப்பு அறிவித்துள்ளது.
யாழ். ஊடக அமையத்தில் நேற்று ஞாயிற்றுக்கிழமை நடைபெற்ற ஊடக சந்திப்பின்போதே அமைப்பின் பிரதிநிதிகள் இந்த அதிருப்தியை வெளிப்படுத்தியுள்ளனர்.
யாழ்ப்பாணம் போதனா வைத்தியசாலையின் சட்ட வைத்திய அதிகாரிக்கு கடந்த ஒக்டோபர் 10 ஆம் திகதியிடப்பட்டு சமர்ப்பிக்கப்பட்டுள்ள இந்த இடைக்கால அறிக்கையில், சித்துப்பாத்தி தளம் முறையான புதைப்பு நடைமுறைகளுடன் ஒற்றுப்போவதாகக் குறிப்பிடப்பட்டுள்ளது.
மேலும், அதிகளவான புதைப்புகள் தொற்றுநோய் அல்லது இயற்கைப் பேரிடரால் ஏற்பட்டிருக்கலாம் எனவும், இறந்தவர்களின் உடல்களை விரைவாக அப்புறப்படுத்தும் நோக்கில் இத்தகைய புதைவுகள் நிகழ்ந்திருக்கக்கூடும் எனவும் அதில் தெரிவிக்கப்பட்டுள்ளதை அமைப்பினர் சுட்டிக்காட்டினர்.
அவர்கள் மேலும் தெரிவிக்கையில்,
“செம்மணி சித்துப்பாத்தி மயானம் என்பது சைவர்களின் எரிகாடு என்பதைத் தாண்டிய விவகாரமாகும். 1995 ஆம் ஆண்டுக்குப் பின்னர் யாழ்ப்பாணக் குடாநாடு இராணுவக் கட்டுப்பாட்டுக்குள் வந்த காலப்பகுதியில், கொடூரமான இராணுவ சோதனைச்சாவடிக்கு அருகிலுள்ள பகுதியில் அமைந்திருந்த இந்த மயானத்தின் பின்னணியை தொல்லியல் குழுவினர் வசதியாக மறைத்துள்ளனர்.
மனித எச்சங்களில் காணப்படும் இறப்பின் போதான காயங்கள், ஆடைகள் அகற்றப்பட்டுப் புதைக்கப்பட்ட முறை, சித்திரவதைக்கான தடயங்கள் மற்றும் அருகிலிருந்த இராணுவ முகாம்கள் தொடர்பில் அறிக்கையில் எத்தகைய குறிப்புகளும் இடம்பெறாமை பாரிய சந்தேகத்தை ஏற்படுத்துகின்றது.
இதற்கு முந்தைய அறிக்கைகளில் ‘மனிதப் புதைகுழி’ என்ற சொற்பதத்தைப் பயன்படுத்தி வந்த பேராசிரியர், தற்போதைய அறிக்கையில் வலிந்து அதனைத் தவிர்த்துள்ளமை அறிக்கையின் துல்லியத்தன்மை மீது அதீத சந்தேகத்தை ஏற்படுத்தியுள்ளது.
பொதுமக்களின் வரிப்பணத்தில் இயங்கும் ஆய்வுக்குழுவினர், மக்களின் நீண்டகால நீதிக்கான கோரிக்கைகளுக்கு விசுவாசமாக இருக்காது அரசின் விருப்பங்களைப் பிரதிபலிக்கும் வகையில் செயற்படுகின்றனர்.
சித்துப்பாத்தியில் மீட்கப்பட்டுள்ள எச்சங்கள் மீதான கார்பன் – காலவியல் பரிசோதனைகள் இலங்கை அரசின் உள்ளகப் பொறிமுறைகளுக்குள் முடக்கப்படக் கூடாது. உலகளாவிய நியமங்களின்படி சர்வதேச மேற்பார்வை பொறிமுறையின் கீழ் முழுமையாக நடத்தப்பட வேண்டும்.
எனவே, செம்மணி உள்ளிட்ட அனைத்து மனிதப் புதைகுழிகள் தொடர்பிலான நீதிவிசாரணைகளுக்கும் ஐக்கிய நாடுகள் மனித உரிமைப் பேரவையின் தலையீட்டுடன் கூடிய நீதியான சர்வதேச விசாரணைப் பொறிமுறை உடனடியாக உருவாக்கப்பட வேண்டும் என்று தமிழ்த் தேசிய மக்கள் சார்பில் வலியுறுத்தி நிற்கின்றோம்.” – என்றனர்.


