காவன்திஸ்ஸ யானை மீது துப்பாக்கிச் சூடு: மேலும் ஐவர் கைது!
காவன்திஸ்ஸ யானை மீது துப்பாக்கிச் சூடு நடத்திய சம்பவம் மற்றும் அதனுடன் தொடர்புடைய சட்டவிரோதச் செயற்பாடுகள் தொடர்பில் மேலும் ஐந்து சந்தேகநபர்கள் கைது செய்யப்பட்டுள்ளனர்.
வனவிலங்கு பாதுகாப்புத் திணைக்களம், பாணந்துறை – வலான மத்திய ஊழல் தடுப்புப் பிரிவு மற்றும் காவல்துறையினர் இணைந்து குறித்த பகுதியில் முன்னெடுத்த விசேட தேடுதல் நடவடிக்கையின்போதே இவர்கள் கைது செய்யப்பட்டுள்ளதாக சுற்றாடல் அமைச்சு தெரிவித்துள்ளது.
முன்னதாக கைது செய்யப்பட்ட பிரதான சந்தேகநபர், காவன்திஸ்ஸ யானை மீது துப்பாக்கிச் சூடு நடத்திய சம்பவத்தில் நேரடியாகத் தொடர்புபட்டுள்ளமை விசாரணைகளில் தெரியவந்துள்ளதாக அமைச்சு குறிப்பிட்டுள்ளது.
மேலும், கைது செய்யப்பட்டுள்ள ஐந்து சந்தேகநபர்களும் அந்த பகுதியில் இடம்பெறும் ஏனைய சட்டவிரோதச் செயற்பாடுகளுடன் தொடர்புடையவர்களாக இருக்கலாம் எனச் சந்தேகிக்கப்படுகிறது.
வனவிலங்கு அதிகாரிகள் மற்றும் கல்கமுவ காவல்துறையினரால் இணைந்து கைது செய்யப்பட்ட சந்தேகநபர்களிடம் தீவிர விசாரணைகள் முன்னெடுக்கப்பட்டு வருகின்றன.
துப்பாக்கிச் சூட்டுக்குப் பயன்படுத்தப்பட்ட ஆயுதங்கள் எங்கிருந்து பெறப்பட்டன, வனவிலங்குகளைக் குறிவைத்து ஒழுங்கமைக்கப்பட்ட சட்டவிரோதக் குழுவொன்று செயற்பட்டதா என்பது குறித்தும் விசாரணைகள் விரிவுபடுத்தப்பட்டுள்ளதாக சுற்றாடல் அமைச்சு மேலும் தெரிவித்துள்ளது.


