சவூதி அரேபியாவில் மரண தண்டனை விதிக்கப்பட்டுள்ள இலங்கைப் பிரஜையான சிவராசா அனோஜனுக்குச் சிறையில் தாக்குதல் நடத்தப்பட்டுள்ளதாகக் கூறப்படும் சம்பவம் குறித்து அரசு உடனடியாக விரைந்து செயற்பட வேண்டும் என்று இலங்கைத் தமிழரசுக் கட்சியின் நாடாளுமன்றக் குழுத் தலைவரும் மட்டக்களப்பு மாவட்ட நாடாளுமன்ற உறுப்பினருமான சாணக்கியன் இராசமாணிக்கம் கோரிக்கை விடுத்துள்ளார்.
நாடாளுமன்றத்தில் இன்று புதன்கிழமை நடைபெற்ற அமர்வின்போது, நிலையியல் கட்டளை 27/2 இன் கீழ் கேள்விகளை முன்வைத்து உரையாற்றும்போதே அவர் மேற்கண்டவாறு குறிப்பிட்டார்.
அவர் மேலும் உரையாற்றுகையில்,
“சவூதி சிறையில் அனோஜனுக்குக் கத்தியால் தாக்குதல் நடத்தப்பட்டுத் தலையில் காயங்கள் ஏற்பட்டுள்ளதாகக் குடும்பத்தார் குறிப்பிடும் நிலையில், நகக் கீறல்களுடனான காயங்களே ஏற்பட்டதாகச் சிறைச்சாலைத் தரப்பு கூறியதாக அமைச்சர் தெரிவித்துள்ளார். அவரது பாதுகாப்பு மற்றும் தற்போதைய நிலை குறித்து அரசு உறுதியளிக்க வேண்டும்.
சவூதி அரசுத் தரப்பு கடுமையான தண்டனையைக் கோரி மேன்முறையீடு செய்துள்ளதாகக் கூறப்படும் நிலையில், முதன்மைத் தீர்ப்பு, மேன்முறையீட்டு ஆவணங்கள் மற்றும் சட்டக் கட்டணங்களின் முழுமையான விவரங்களைச் சபையில் சமர்ப்பிக்க வேண்டும். மேலும், அனோஜனின் மேன்முறையீட்டுக்கு அனுமதி அளித்தது யார் என்பது தொடர்பிலும் விளக்கமளிக்கப்பட வேண்டும்.
சவூதிக்குச் சென்ற சட்டப் பிரதிநிதிகள் குழுவின் விஜயம் மற்றும் பிரதி சபாநாயகர் தலைமையிலான நாடாளுமன்றப் பிரதிநிதிகள் குழுவின் பயணம் தொடர்பில் சவூதி தரப்பு சம்மதம் தெரிவித்துள்ளதா என்பதையும், அனோஜன் வேறு சிறைக்கு மாற்றப்பட்டுள்ளாரா என்பதையும் தெளிவுபடுத்த வேண்டும்.
இந்த விவகாரத்தில் எவரும் அரசியல் நோக்கத்துடன் செயற்படவில்லை. அனோஜனை எவ்வாறாவது பாதுகாத்து நாட்டுக்கு அழைத்து வர வேண்டும். அரசு எடுக்கும் சகல நடவடிக்கைகளுக்கும் இலங்கைத் தமிழரசுக் கட்சி முழுமையான ஒத்துழைப்பை வழங்கும்.” – என்றார்.
