இலங்கையின் தேசிய பாதுகாப்பு மற்றும் சர்வதேச உறவுகள் குறித்துத் தற்போதைய அரசுக்கு எவ்வித இராஜதந்திரப் புரிதலும் இல்லை எனவும், சர்வதேசக் கடற்பரப்பில் எழுந்துள்ள நெருக்கடிகளை இராஜதந்திர முறையில் கையாள அரசு தவறிவிட்டது எனவும் ஐக்கிய மக்கள் சக்தியின் நாடாளுமன்ற உறுப்பினர் எஸ்.எம்.மரிக்கார் கடுமையாகக் குற்றஞ்சாட்டியுள்ளார்.
இது தொடர்பில் ஊடகங்களிடம் அவர் மேலும் தெரிவிக்கையில்,
“நாட்டின் பொருளாதார நிலைமை மோசமடைந்துள்ளதால் மக்கள் உணவருந்தவும், பிள்ளைகளுக்குக் கற்பிக்கவும், மருந்து வாங்கவும் முடியாத நிலைக்குத் தள்ளப்பட்டுள்ளனர். உலக வங்கி அறிக்கையின்படி நாட்டின் 65 சதவீதமான மக்கள் வறுமை நிலைக்குத் தள்ளப்பட்டுள்ளனர்.
இலங்கையைச் சுற்றியுள்ள சர்வதேசக் கடற்பரப்பில் அமெரிக்காவினால் தடைவிதிக்கப்பட்ட 21 ஈரானியக் கப்பல்கள் இருப்பதாகக் கூறப்படும் நிலையில், இது தொடர்பாக அரசும் பாதுகாப்பு அமைச்சரும் நாடாளுமன்றத்தில் எவ்வித விளக்கத்தையும் அளிக்கவில்லை.
நாட்டின் தேசிய பாதுகாப்பை உறுதிப்படுத்த அமெரிக்க அரசுடன் இராஜதந்திர மட்டத்தில் பேச்சு நடத்தப்பட வேண்டும்.
சர்வதேசத்துடன் எவ்வாறு கையாள்வது என்பது அரசுக்குத் தெரியவில்லை. இதன் காரணமாகவே ஐக்கிய நாடுகள் சபையின் கூட்டத்தொடரிலும் ஜனாதிபதி பங்கேற்கவில்லை. தங்களால் முடியாவிட்டால் எதிர்க்கட்சியிடம் ஆலோசனைகளைக் கேட்கலாம்.
அரசு மேற்கொண்டுள்ள நடவடிக்கைகள் சரியானவை என்றும் மக்கள் ஆதரவு தமக்கு இருப்பதாக நம்பினால், உடனடியாக மாகாண சபைத் தேர்தலை நடத்த முன்வர வேண்டும். அந்தத் தேர்தலில் ஐக்கிய மக்கள் சக்தியே அமோக வெற்றி பெறும்.” – என்றார்.
