எரிபொருள் விலைச் சூத்திரத்தை அரசு உடனடியாக வெளிப்படுத்த வேண்டும்! : மதுர விதானகே வலியுறுத்தல்!!
மத்திய கிழக்கில் போர் உச்சக்கட்டத்திலிருந்தபோது இலங்கை ஒரு பீப்பாய் டீசலை சுமார் 286 அமெரிக்க டொலர்களுக்குக் கொள்வனவு செய்ததாகக் கூறப்படும் நிலையில், தற்போது அதிகரிக்கப்பட்ட எரிபொருள் விலையை நிர்ணயித்த விலைச் சூத்திரத்தை அரசு உடனடியாக மக்களுக்கு வெளிப்படுத்த வேண்டும் என்று சர்வஜன அதிகாரம் கட்சியின் செயற்பாட்டாளரும் சட்டத்தரணியுமான மதுர விதானகே சுட்டிக்காட்டினார்.
கொழும்பில் அமைந்துள்ள சர்வஜன அதிகாரம் கட்சியின் காரியாலயத்தில் நேற்று வியாழக்கிழமை நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் மேற்கண்டவாறு குறிப்பிட்டார்.
அவர் மேலும் தெரிவிக்கையில்,
“மத்திய கிழக்குப் போர் உச்சக்கட்டத்தில் இருந்தபோது, உலகின் எந்தவொரு நாடும் கொள்வனவு செய்யாத அளவுக்கு அதிக விலைக்கு இலங்கை டீசலைக் கொள்வனவு செய்துள்ளது. இது தொடர்பில் எச்.எஸ்.பி.சி. வங்கியின் தலைவர் ஹாங்காங் மாநாடொன்றில் கவலை வெளியிட்டிருந்தார்.
ஆகஸ்ட் மற்றும் செப்டெம்பர் மாதங்களில் கொண்டுவரப்பட்ட எரிபொருள் கப்பல்களுக்குச் செலுத்தப்பட்ட தொகை, டீசல் மற்றும் பெற்றோல் கொள்வனவு விலை, துறைமுகத்தில் இறக்கப்பட்ட விலை, சுங்கக் கட்டணம், காப்புறுதி, கப்பல் கட்டணம், கையாளும் செலவு மற்றும் விநியோகஸ்தர்களுக்கான செலவுகள் உள்ளிட்ட அனைத்து விவரங்களையும் அரசு வெளிப்படுத்த வேண்டும்.
399 ரூபாவாக இருந்த பெற்றோல் விலை தற்போது 414 ரூபாவாக அதிகரிக்கப்பட்டுள்ளது. அதேவேளை 70 ரூபா மானியம் வழங்கப்படுகின்றது என்று கூறப்படுவதால், ஒரு லீற்றர் பெற்றோலுக்கான உண்மையான செலவு எவ்வாறு கணக்கிடப்படுகின்றது என்பதை அரசு தெளிவுபடுத்த வேண்டும்.
‘மக்கள் அரசு’ எனக் கூறிக்கொள்ளும் தற்போதைய அரசு வெளிப்படைத்தன்மையுடன் செயற்பட வேண்டும். பெற்றோலியக் கூட்டுத்தாபனத்தில் இடம்பெறும் முறைகேடுகள் தொடர்பில் விசாரிப்பதற்காக முன்னர் இயங்கிய உள்நாட்டு விசாரணைப் பிரிவை மீளச் செயற்படுத்த வேண்டும்.” – என்றார்.
