மண்டபம் இலங்கைத் தமிழர் மறுவாழ்வு முகாமில் இலங்கைத் தமிழர் ஒருவர் மீது காலணி வீசப்பட்டதாக எழுந்த புகார் தொடர்பாக இலங்கை தமிழர் மறுவாழ்வு ஆணையர் சதீஷ் இன்று புதன்கிழமை மாலை (30) நேரில் ஆய்வு மேற்கொண்டார்.
ராமநாதபுரம் மாவட்டம் மண்டபம் இலங்கை தமிழர் முகாமில் வசித்து வரும் இலங்கைத் தமிழர்களை சந்தித்த ஆணையர் சதீஷ், அவர்களின் குறைகள் மற்றும் கோரிக்கைகளை கேட்டறிந்தார்.
இலங்கையில் ஏற்பட்ட பொருளாதார நெருக்கடி காரணமாக வாழ்வாதாரம் பாதிக்கப்பட்டு இந்தியாவுக்கு அகதிகளாக வந்துள்ளவர்களில் சிலர், மீண்டும் இலங்கைக்குச் செல்ல விருப்பம் தெரிவித்து மனு அளித்தனர்.
மேலும், முகாமில் வசிக்கும் இலங்கை தமிழர்கள் ஆணையரை நேரில் சந்தித்து ஆதார் வழங்கி அடிப்படை வசதிகள் செய்து தர வேண்டும் என கோரிக்கைகளை முன் வைத்துள்ளனர்.முகாமில் புதிதாக கட்டப்பட்டு வரும் வீடுகள் மற்றும் நலத்திட்ட பணிகளையும் ஆணையர் நேரில் பார்வையிட்டு ஆய்வு செய்தார்.வீடுகளில் குடிநீர், மின்சாரம் உள்ளிட்ட அடிப்படை வசதிகள் குறித்து அதிகாரிகளிடம் கேட்டறிந்தார்.
ஆய்வின்போது, முகாமில் வசிக்கும் இலங்கைத் தமிழர்கள், ஆதார் அட்டை இல்லாததால் மாணவர்களை ப் பாடசாலைகளில் சேர்ப்பதிலும், அரசு மருத்துவமனைகளில் சிகிச்சை பெறுவதிலும் சிரமம் ஏற்படுவதாக அவர்கள் தெரிவித்தனர்.
மேலும், நீண்ட காலமாக முகாமில் பதிவில் உள்ள இலங்கைத் தமிழர்களுக்கு சிறப்பு தணிக்கை, விடுமுறை பெறுவதில் விலக்கு அளிக்க வேண்டும், முகாமில் சீரான மின் விநியோகம் செய்ய வேண்டும், மின் பணியாளரை நிரந்தரமாக அமைக்க வேண்டும், நுழைவாயில் இரவு நேரங்களில் கூடுதல் போலீசார் பாதுகாப்பு பணியில் அமர்த்த வேண்டும் என்ற கோரிக்கைகளை மனுவாக அளித்தனர்.
இதனிடையே, இலங்கைத் தமிழர் ஒருவர் மீது காலணி வீசப்பட்டதாக கூறப்படும் சம்பவம் தொடர்பாக மாவட்ட ஆட்சியர் தரப்பில் அறிக்கை பெறப்பட்டு, அது தொடர்பாக விசாரணை நடத்தப் பட்டுள்ளதாக ஆணையர் தெரிவித்தார்.
முகாமில் நடைபெற்று வரும் அனைத்து நலத்திட்ட பணிகள் மற்றும் புதிய வீடுகள் கட்டுமான பணிகளை நேரில் ஆய்வு செய்ததாகவும் அவர் தெரிவித்தார்.
