முன்னாள் ஜனாதிபதி ரணில் விக்ரமசிங்க இன்று (30) கொழும்பு கோட்டை நீதிமன்றத்திற்கு வருகை தந்துவிட்டு வெளியேறியபோது, அவரது பாதுகாப்பு அதிகாரியொருவர் ஊடகவியலாளர் ஒருவரினால் கெமராவால் தாக்கப்பட்டதாகக் கூறப்படும் காணொளி வெளியாகியுள்ளது.
தனியார் தொலைக்காட்சி நிறுவனமொன்றைச் சேர்ந்த ஊடகவியலாளர் ஒருவர், தனது பணியை மேற்கொண்டுகொண்டிருந்தபோது, முன்னாள் ஜனாதிபதிக்கு பாதுகாப்பு வழங்கி வந்த அதிகாரியின் தலையில் கெமராவால் தாக்கியதாகக் கூறப்படுகிறது.
பாதுகாப்பு அதிகாரியின் பணிக்கு இடையூறு ஏற்படும் வகையில் ஊடகவியலாளர் நடந்துக்கொண்டதாகவும் , இதன்போதே குறித்த சம்பவம் இடம்பெற்றதாகவும் தகவல்கள் தெரிவிக்கின்றன.
இந்த சம்பவம் தொடர்பில் குறித்த பாதுகாப்பு அதிகாரி கொம்பனித்தெரு காவல்துறையில் முறைப்பாடு செய்துள்ளதாகவும், பின்னர் கொழும்பு தேசிய மருத்துவமனையில் அனுமதிக்கப்பட்டுள்ளதாகவும் தகவல்கள் வெளியாகியுள்ளன.
சம்பவம் தொடர்பான காணொளி காட்சி தற்போது சமூக வலைத்தளங்களிலும் ஊடகங்களிலும் வெளியாகி வருகின்ற நிலையில், சம்பவம் தொடர்பான மேலதிக விசாரணைகள் முன்னெடுக்கப்பட்டு வருவதாக தெரிவிக்கப்படுகிறது.
