தலவாக்கலை நகரிலுள்ள பிரதான பாடசாலையொன்றில் கல்வி பயிலும் 13ஆம் தர மாணவியொருவரிடம் தகாத முறையில் நடந்துகொண்டு, அத்துமீற முயன்றதாகக் கூறப்படும் சம்பவம் தொடர்பில் கைது செய்யப்பட்ட விஞ்ஞான ஆசிரியர் ஒருவர் விளக்கமறியலில் வைக்கப்பட்டுள்ளார்.
தலவாக்கலை பொலிஸாரால் கைது செய்யப்பட்ட 50 வயதுடைய சந்தேகநபர், நேற்று (28) நுவரெலியா நீதவான் நீதிமன்றில் முன்னிலைப்படுத்தப்பட்டார்.
இதன்போது, சந்தேகநபரை எதிர்வரும் ஒக்டோபர் 06ஆம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார்.
பொலிஸ் விசாரணைகளின்படி, மாணவியை விஞ்ஞான ஆய்வுகூடத்திற்கு வருமாறு ஆசிரியர் அழைத்ததாகவும், அங்கு மாணவியிடம் தகாத முறையில் நடந்துகொண்டதாகவும் தெரிவிக்கப்பட்டுள்ளது.
சம்பவத்தையடுத்து மாணவி தனது பெற்றோருக்கு தகவல் வழங்கியதுடன், பெற்றோருடன் தலவாக்கலை பொலிஸ் நிலையத்துக்குச் சென்று முறைப்பாடு செய்துள்ளார். அதன் அடிப்படையில் சந்தேகநபர் கைது செய்யப்பட்டதாக பொலிஸார் தெரிவித்துள்ளனர்.
சம்பவம் தொடர்பான மேலதிக விசாரணைகளை தலவாக்கலை பொலிஸார் முன்னெடுத்து வருகின்றனர்.
