யாழ்ப்பாணம் – மாதகல் குசுமன்துறை கடற்கரைப் பகுதியில் இன்று (27) அதிகாலை கடற்படையினரால் மேற்கொள்ளப்பட்ட விசேட நடவடிக்கையின் போது கைப்பற்றப்பட்ட போதைப்பொருள் தொகுதியின் மொத்தப் பெறுமதி 1.5 பில்லியன் ரூபாய் என பாதுகாப்பு பிரதி அமைச்சர் அருண ஜயசேகர தெரிவித்துள்ளார்.
கடற்படையினரால் மேற்கொள்ளப்பட்ட நடவடிக்கையின் போது மீட்டெடுக்கப்பட்ட இந்த போதைப்பொருள் தொகுதி தொடர்பாக நடைபெற்ற விசேட செய்தியாளர் சந்திப்பில் கலந்துகொண்டு கருத்து தெரிவிக்கும்போதே பிரதி அமைச்சர் இதனைத் தெரிவித்தார்.
அதற்கமைய, இந்த நடவடிக்கையின் போது கடற்படையினரால் பொறுப்பேற்கப்பட்ட போதைப்பொருள் தொகுதியின் மொத்த அளவு சுமார் 81 கிலோகிராம் எனத் தெரிவித்த பிரதி அமைச்சர், அதற்குள் சுமார் 35 கிலோகிராம் ஹெரோயின் மற்றும் சுமார் 45 கிலோகிராம் ஐஸ் போதைப்பொருள் அடங்குவதாகவும் குறிப்பிட்டார்.
அத்துடன், அண்மைய காலங்களில் வடக்கிலிருந்து கைப்பற்றப்பட்ட மிகப்பெரிய போதைப்பொருள் தொகுதி இதுவென்றும் பிரதியமைச்சர் தெரிவித்தார்.
மேலும், 2025 ஆம் ஆண்டில் கடற்படையினரால் மேற்கொள்ளப்பட்ட நடவடிக்கைகளின் போது மீட்கப்பட்ட போதைப்பொருட்களின் பெறுமதி சுமார் 75 பில்லியன் ரூபாய் எனக் குறிப்பிட்ட பிரதியமைச்சர், இந்த ஆண்டில் இதுவரை மேற்கொள்ளப்பட்ட நடவடிக்கைகளில் பொறுப்பேற்கப்பட்ட போதைப்பொருள் தொகுதிகளின் பெறுமதி 56 பில்லியன் ரூபாய் என்றும் தெரிவித்தார்.
இதேவேளை இந்த செய்தியாளர் சந்திப்பில் கலந்துகொண்டு கருத்து தெரிவித்த கடற்படைத் தளபதி வைஸ் அட்மிரல் டேமியன் பெர்னாண்டோ, வடக்கு கட்டளை பிரிவுக்கு கிடைத்த புலனாய்வுத் தகவலுக்கு அமைய, பல குழுக்கள் இணைந்து இந்த முற்றுகையை மேற்கொண்டதாகத் தெரிவித்தார்.
அதற்கமைய, கைப்பற்றப்பட்ட இந்த போதைப்பொருள் தொகுதி யாழ்ப்பாண பொலிஸ் போதைப்பொருள் தடுப்புப் பிரிவின் உதவியுடன் மேலதிக பரிசோதனைகளுக்காக அனுப்பி வைக்கப்பட்டதாக கடற்படைத் தளபதி குறிப்பிட்டார்.
கடற்படையினர் தற்போது குழுக்களாக நடவடிக்கைகளை மேற்கொண்டு வருவதாகவும், அதற்கமைய எதிர்காலத்தில் மேற்கொள்ளப்படும் நடவடிக்கைகள் மேலும் தீவிரமடையும் என்றும் கடற்படைத் தளபதி தெரிவித்தார்.
அத்துடன், கடற்படையினரால் மேற்கொள்ளப்படும் நடவடிக்கைகள் சிக்கலான சூழலில் இடம்பெறுவதாகவும், கடற்படை எதிர்காலத்தில் நடவடிக்கைகளுக்காக தொழில்நுட்பத்தைப் பயன்படுத்த எதிர்பார்க்கிறது என்றும் குறிப்பிட்டார்.
இதற்காக தேவைப்படும் உபகரணங்கள் தற்போது கடற்படைக்கு கிடைத்து வருவதாகவும், அதற்கமைய எதிர்காலத்தில் பரந்தளவில் முற்றகை நடவடிக்கைகள் மேற்கொள்ளப்படும் என்றும் கடற்படைத் தளபதி தெரிவித்தார்.
