அனோஜனைக் காப்பாற்ற பிரதி சபாநாயகர் தலைமையிலான குழு சவூதி பயணம்! – வெளிவிவகார அமைச்சர் அறிவிப்பு
சவூதி அரேபியாவில் மரண தண்டனை விதிக்கப்பட்டுள்ள சிவராசா அனோஜனைக் காப்பாற்றும் பொருட்டு, பிரதி சபாநாயகர் வைத்தியர் ரிஸ்வி சாலி தலைமையில் அரச மற்றும் எதிர்க்கட்சி எம்பிக்கள் அடங்கிய குழுவொன்றைச் சவூதி அரேபியாவுக்கு அனுப்பத் தீர்மானிக்கப்பட்டுள்ளது என்று வெளிவிவகார அமைச்சர் விஜித ஹேரத் இன்று நாடாளுமன்றத்தில் தெரிவித்தார்.
நாடாளுமன்றத்தில் இன்று விசேட கூற்றையொன்றை முன்வைத்து உரையாற்றியபோதே அவர் மேற்கண்டவாறு குறிப்பிட்டார்.
அனோஜனுக்குப் பொதுமன்னிப்பு வழங்குமாறு கோரும் ஜனாதிபதியின் பிரத்தியேகக் கடிதத்தைச் சவூதி அரசருக்கு நேரில் கையளிப்பதற்காகவே இந்த நாடாளுமன்றப் பிரதிநிதிகள் குழு சவூதி அரேபியா செல்லவுள்ளது.
அடுத்த வாரம் நியூயோர்க்கில் நடைபெறவுள்ள ஐ.நா. பொதுச் சபைக் கூட்டத் தொடரின்போது சவூதி வெளிவிவகார அமைச்சரைத் தாம் நேரில் சந்திக்கவுள்ளதாகத் தெரிவித்த அமைச்சர் விஜித ஹேரத், அப்போது பொதுமன்னிப்பு வழங்குதல், தண்டனையைக் குறைத்தல் அல்லது ஏதேனும் நிவாரணங்களை வழங்குவது தொடர்பில் தீவிரமாக வலியுறுத்தவுள்ளதாகவும் கூறினார்.
இந்தச் சம்பவத்தில் சட்டபூர்வமான தலையீடுகளை மேற்கொள்வதற்கும், அங்குள்ள சட்டத்தரணிகள் மற்றும் அதிகாரிகளுடன் ஒருங்கிணைந்து செயற்படுவதற்கும் ஜனாதிபதி சட்டத்தரணிகளான உபுல் குமாரப்பெரும மற்றும் பைசர் முஸ்தபா ஆகியோர் தங்களது சொந்தச் செலவில் சவூதி அரேபியா செல்ல ஒப்புக்கொண்டுள்ளனர் என்றும் அவர் மேலும் குறிப்பிட்டார்.
