இலங்கை–இங்கிலாந்து ஒருநாள் தொடர் இன்று ஆரம்பமாகிறது

இலங்கை மற்றும் இங்கிலாந்து அணிகளுக்கு இடையிலான மூன்று போட்டிகள் கொண்ட ஒருநாள் தொடரின் முதல் போட்டியானது இன்றைய தினம் ஆரம்பமாகவுள்ளது.

இந்தப் போட்டியானது செஸ்டர்-லே-ஸ்ட்ரீட் (Chester-le-Street) மைதானத்தில் இலங்கை நேரப்படி மாலை 5.00 மணிக்கு ஆரம்பமாகும்.

இங்கிலாந்து அணியை ஹாரி ப்ரூக் வழிநடத்தவுள்ளார்; அதேவேளையில் இலங்கை அணியை குசல் மெண்டீஸ் வழிநடத்தவுள்ளார்.

இலங்கைக்கு எதிராக 3-0 என்ற கணக்கில் வெற்றி பெற்றதையடுத்து, இங்கிலாந்து நம்பிக்கையுடன் ஒருநாள் தொடரில் களமிறங்குகிறது.

டி:20 போட்டிகளில் அவர்களின் வேகப்பந்து வீச்சு ஆரம்பத்திலேயே பலமுறை ஆட்டத்தில் நெருக்கடியை ஏற்படுத்தியது, அதே நேரத்தில் துடுப்பாட்டப் பிரிவும் இந்த குறுகிய வடிவப் போட்டிகள் முழுவதும் ஆக்ரோஷமான அணுகுமுறையைக் கடைப்பிடித்தது.

இருப்பினும், 50 ஓவர் கிரிக்கெட் வடிவத்தில் ஹாரி புரூக்கின் அணி, தங்களது அதிரடி ஆட்டத்தையும், குறிப்பாக நடுத்தர ஓவர்களில், சீரான ஸ்டிரைக் ரேட்டேடையும் இணைத்துக் கையாள வேண்டும்.

அதேவ‍ேளை, டி:20 போட்டிகளில் இங்கிலாந்தின் வேகப்பந்து வீச்சை எதிர்கொள்ளத் திணறிய இலங்கை அணிக்கு, ஒருநாள் போட்டி ஒரு மீள்வருகைக்கான வாய்ப்பாக அமையும்.

ஆட்டத்தில் நீண்ட நேரம் களத்தில் நின்று பார்ட்னர்ஷிப்களை உருவாக்க அதிக வாய்ப்பு இருப்பதால், பத்தும் நிஸ்ஸங்க மற்றும் குசல் மெண்டிஸ் ஆகியோர் அணியின் திட்டமிடலில் முக்கியப் பங்காற்றுவார்கள்.

இதேவேளை, பந்து வீச்சில் வனிந்து ஹசரங்க, துனித் வெல்லாலகே மற்றும் மஹீஷ் தீக்ஷன ஆகியோரைக் கொண்ட சுழற்பந்து வீச்சு கூட்டணி ஒரு முக்கிய காரணியாக அமையக்கூடும்.

அண்மைய ஆண்டுகளில் இங்கிலாந்து மற்றும் இலங்கை அணிகளுக்கு இடையே மிகவும் விறுவிறுப்பான ஒருநாள் போட்டிகள் நடைபெற்றுள்ளன.

இவ்விரு அணிகளும் மோதிய கடந்த ஐந்து முழுமையான போட்டிகளில், இங்கிலாந்து மூன்று முறையும் இலங்கை இரண்டு முறையும் வெற்றி பெற்றுள்ளன.

2021 ஜூன் மாதம் செஸ்டர்-லே-ஸ்ட்ரீட்டில் நடைபெற்ற முந்தைய ஒருநாள் போட்டியிலும் இங்கிலாந்து அணி இலங்கையை ஐந்து விக்கெட் வித்தியாசத்தில் தோற்கடித்தமையும் குறிப்பிடத்தக்கது.