சவூதி அரேபியாவில் மரண தண்டனை விதிக்கப்பட்டுள்ள சிவராசா அனோஜனின் விடுதலைக்காக முன்னெடுக்கப்பட வேண்டிய அனைத்து முயற்சிகளையும் தான் உறுதியாக மேற்கொள்வேன் என்று எதிர்க்கட்சித் தலைவர் சஜித் பிரேமதாஸ உறுதியளித்துள்ளார்.
அனோஜனின் பெற்றோர் மற்றும் குடும்பத்தினர் இன்று திங்கட்கிழமை கொழும்பிலுள்ள எதிர்க்கட்சித் தலைவர் அலுவலகத்தில் சஜித் பிரேமதாஸவைச் சந்தித்துக் கலந்துரையாடினர்.
இந்தச் சந்திப்பில் அனோஜனின் தந்தையரான தம்பிராசா சிவராசா, தாயாரான இராசமாணிக்கம் யோகலட்சுமி, சகோதரர் சிவராசா ஹம்சிதன் மற்றும் குடும்ப உறவுகள் கலந்துகொண்டனர்.
அவர்களுடன் நடைபெற்ற கலந்துரையாடலின்போது, எதிர்க்கட்சித் தலைவர் சஜித் பிரேமதாஸ உடனடியாக இலங்கைக்கான சவூதி அரேபியாவின் தூதுவரைத் தொலைபேசி மூலம் தொடர்புகொண்டு, அனோஜனின் விடுதலை தொடர்பான விவரங்களை விசாரித்தறிந்தார்.
மேலும், சவூதி சிறையில் தடுத்து வைக்கப்பட்டுள்ள அனோஜனுடன் தொலைபேசி வழியாக நேரடியாகப் பேசி நிலைமைகளைக் கேட்டறிந்ததுடன், வெளிநாட்டு அலுவல்கள் அமைச்சின் செயலாளரையும் தொடர்புகொண்டு அவரது விடுதலைக்காக அரசு தற்போது முன்னெடுத்துள்ள வேலைத்திட்டங்கள் குறித்தும் கேட்டறிந்தார்.
சாதி, மத பேதங்களுக்கு அப்பால் நின்று அனோஜனின் விடுதலைக்காகச் செய்யக்கூடிய உச்சபட்ச அனைத்து முயற்சிகளையும் தான் தாமதமின்றிச் செய்வேன் என்று அனோஜனின் பெற்றோரிடம் எதிர்க்கட்சித் தலைவர் சஜித் பிரேமதாஸ இதன்போது உறுதியளித்தார்.
