ஜனாதிபதியின் தலைமைத்துவம் மீது வடக்கு மக்கள் நம்பிக்கை வைத்திருக்கின்றார்கள்.!

கௌரவ ஜனாதிபதி அநுரகுமார திசாநாயக்கவின் தலைமைத்துவத்தின் மீது வடக்கு மக்கள் நம்பிக்கையும், எதிர்பார்ப்பும் வைத்திருக்கின்றார்கள் என வடக்கு மாகாண கௌரவ ஆளுநர் நா.வேதநாயகன் அவர்கள் தெரிவித்தார்.

யாழ்ப்பாண மாவட்ட ஒருங்கிணைப்புக் குழுக் கூட்டம் ஜனாதிபதி அநுரகுமார திஸாநாயக்கவின் பங்கேற்புடன் யாழ். மாவட்டச் செயலக கேட்போர் கூடத்தில் இன்று வெள்ளிக்கிழமை காலை (31.01.2025) இடம்பெற்றது.

இந்தக் கூட்டத்தில் யாழ். மாவட்ட ஒருங்கிணைப்புக் குழுவின் தலைவரும் கடற்றொழில் நீரியல் மற்றும் கடல் வளங்கள் அமைச்சருமான கௌரவ இராமலிங்கம் சந்திரசேகர் மற்றும் போக்குவரத்து, நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சர் கௌரவ பிமல் ரத்நாயக்க ஆகியோரும் கலந்துகொண்டிருந்தனர்.

யாழ்ப்பாண தேர்தல் மாவட்டத்தை பிரதிநிதித்துவப்படுத்திய கௌரவ நாடாளுமன்ற உறுப்பினர்கள், வடக்கு மாகாண சபையின் பிரதம செயலர், அமைச்சுக்களின் செயலர்கள், மாகாணப் பணிப்பாளர்கள், அதிகாரிகள் ஆகியோரும் பங்கேற்றிருந்தனர்.

வடக்கு மக்கள் சார்பாக கௌரவ ஜனாதிபதி அவர்களை வரவேற்பதாகக் குறிப்பிட்ட ஆளுநர், ஜனாதிபதியின் தலைமைத்துவத்தில் இந்தப் பிரதேசத்தில் மிகப் பெரிய மாற்றம் நடைபெறும் என எதிர்பார்ப்பதாகவும், இந்தப் பகுதி மக்கள் அவர் மீது நம்பிக்கை வைத்துள்ளதாகவும் தெரிவித்தார்.

ஊழலற்ற ஆட்சி மக்களின் எதிர்பார்ப்பாக இருக்கின்ற நிலையில் அதை ஜனாதிபதி வழங்குவார் என நம்பிக்கையுடன் இருப்பதாகவும், அரசாங்கத்தால் முன்னெடுக்கப்படும் வேலைத் திட்டங்களுக்கு முழுமையான ஒத்துழைப்பு வழங்கப்படும் எனவும் ஆளுநர் குறிப்பிட்டார்.

இதேவேளை மாவட்ட ஒருங்கிணைப்புக் குழுவில் ஒவ்வொரு துறைசார் விடயங்களும் ஆராயப்பட்டிருந்தன.

இதன்போது தேசிய வீடமைப்பு அதிகார சபையால் கடந்த காலங்களில் முன்னெடுக்கப்பட்டு அரைகுறை நிலையிலுள்ள வீடுகளுக்காக நிதி ஒதுக்கீடு தேவை என ஜனாதிபதியிடம் ஆளுநர் வலியுறுத்தினார். அதேபோல யாழ். மாவட்டத்திலிருந்து கடந்த காலங்களில் முன்னெடுக்கப்பட்ட புகையிரத சேவைகள் சில நிறுத்தப்பட்டுள்ளமையை சுட்டிக்காட்டிய ஆளுநர் அதனை மீள ஆரம்பிக்குமாறு கோரிக்கை முன்வைத்தார்.

மேலும் இலங்கை போக்குவரத்து சபையின் பேருந்துகளும், தனியார் பேருந்துகளும் ஒரேயிடத்திலிருந்து நெடுந்தூர சேவையை இணைந்த நேர அட்டவணையின் கீழ் ஆரம்பிக்கப்பட வேண்டியதன் அவசியத்தை வலியுறுத்திய ஆளுநர், இலங்கை போக்குவரத்துச் சபையினர் அதற்கு ஒத்துழைக்கப் பின்னடிக்கின்றனர் என்பதையும் ஜனாதிபதியின் கவனத்துக்கு கொண்டுசென்றார்.