மாவீரர் நாளை முன்னிட்டு வடமாகாண சபையின் முன்னாள் உறுப்பினர் எம்.கே. சிவாஜிலிங்கம் கொட்டும் மழைக்கு மத்தியிலும் மாவீரர்களுக்கு அஞ்சலி செலுத்தியுள்ளார்.உடல் நலக் குறைவினால் பாதிக்கப்பட்டுள்ள போதிலும் அவர் இந்த அஞ்சலி நிகழ்வுகளை வழமை போன்று மேற்கொண்டுள்ளார்.நவம்பர் 27 இல் தேசிய நினைவெழுச்சி நாள் கடைப்பிடிக்கப்படுவதற்கு காரணமாக இருக்கும் தமிழீழ விடுதலைப்புலிகளின் முதல் மாவீரான லெப்டினன்ட் சங்கர் என அழைக்கப்படும் செல்வச்சந்திரன் சத்தியநாதனின் கம்பர்மலையில் உள்ள பூர்வீக இல்லத்துக்கு முன்பாக இன்று பகல் ஈகைச் சுடரேற்றி அஞ்சலி செலுத்தப்பட்டது.சங்கரின் அன்னை வடமாகாண சபையின் முன்னாள் உறுப்பினர் எம்.கே.சிவாஜிலிங்கம் உட்பட்ட பலர் கலந்துகொண்டு அஞ்சலி செலுத்தியிருந்தனர். யாழ்ப்பாணம் – வல்வெட்டித்துறை ரேவடி கடற்கரையில் கடற்புலி மாவீரர்களுக்கான நினைவேந்தல் இடம்பெற்றுள்ளது.தமிழீழ விடுதலைப் புலிகளின் கடற்புலிகள் அமைப்பில் இருந்து மாவீரர்களாக உயிர்நீத்தவர்களுக்கு இதன்போது அஞ்சலி செலுத்தப்பட்டது.மேலும் மாவீரர் நாளான நேற்று அகிம்சை வழியில் உண்ணாவிரதம் இருந்து உயிர்நீத்த தியாகி திலீபனுக்கும் அஞ்சலி செலுத்தப்பட்டது. யாழ்ப்பாணம் நல்லூர் பகுதியில் உள்ள தியாகி திலீபனின் நினைவிடத்திலேயே ஈகை சுடரேற்றி அஞ்சலி செலுத்தப்பட்டது.இதன் போது மாவீரர்களுக்கு அகவணக்கம் செலுத்தி தீபமேற்றி மலரஞ்சலி செலுத்தப்பட்டது.அத்துடன் கோப்பாய் மாவீரர் துயிலுமில்லம் முன்பும் சுடரேற்றி அஞ்சலி செலுத்தப்பட்டுள்ளது.கோப்பாய் துயிலும் இல்லம் ஸ்ரீலங்கா இராணுவத்தினரால் இடித்தது அழிக்கப்பட்டு தற்போது இராணுவத்தினரின் 51 ஆவது படைப்பிரிவின் தலைமையகம் அமைக்கப்பட்டுள்ளமை குறிப்பிடத்தக்கது.அதேபோன்று யாழ்ப்பாணம் – கொடிகாமம் மாவீரர் துயிலும் இல்லம் அமைந்திருந்த பகுதிக்கு முன்பாக இன்றைய தினம் மாவீரர்களுக்கு அஞ்சலி செலுத்தப்பட்டது.கொடிகாமம் மாவீரர் துயிலும் இல்லம் தற்பொழுது ஸ்ரீலங்கா இராணுவத்தின் 522 வது பிரிகேட் தலைமையகமாக இயங்கி வருகின்றது.இந்த நிலையில் முதலாவது கரும்புலி மாவீரா் மில்லாின் நினைவாக நெல்லியடி மத்திய கல்லூரியின் முன்பாகவும் நினைவேந்தல் இடம்பெற்றுள்ளது.இறுதியாக எல்லங்குளம் மாவீரர் துயிலும் இல்லத்திற்கு முன்பாகவும் அஞ்சலிகள் செலுத்தப்பட்டன இத்துயிலும் இல்லத்தில் ராணுவ முகாம் அமைக்கப்பட்டு இருக்கிறது என்பது குறிப்பிடத்தக்கது மாவீரர் தினமான இன்றைய தினம் அனைத்து இடங்களிலும் சிவாஜிலிங்கம் தலைமையில் மாவீரர்கள் நினைவாக ஈகை சுடரேற்றப்பட்டு அஞ்சலி செலுத்தப்பட்டுள்ளது.
