இந்தியாவின் அருணாச்சல பிரதேசம் மாநிலத்தில், சீன இராணுவத்தினருடன் இந்தியப் படையினர் தொடர்ந்து பல்வேறு மோதல் நிலைகளை எதிர்கொண்டு வருவதாக, இந்திய- திபெத் எல்லைக் காவல் படையின் தலைமை அதிகாரி சத்ருஜீத் கபூர் தெரிவித்துள்ளார்.
இமயமலைப் பகுதியில் சீனாவுடனான எல்லையைப் பாதுகாக்கும் இந்தியாவின் துணை இராணுவப் படையின் தலைவரான அவர், கடந்த வாரம் இந்தத் தகவலை வெளியிட்டுள்ளார்.
அருணாச்சலப் பிரதேசத்தின் தொலைதூரப் பகுதியான அப்பர் சுபன்சிரி பகுதியில், சீனப் படையினர் இந்திய எல்லைக்குள் ஊடுருவி வருவதாகவும், இந்தியப் படையினர் வழக்கமாக ரோந்துப் பணியில் ஈடுபடும் சில பகுதிகளுக்குச் செல்வதைத் தடுப்பதாகவும் உள்ளூர் அமைப்புகள் முன்னதாகக் குற்றஞ்சாட்டியிருந்தன.
எனினும், இந்திய அரசாங்கம் இந்த எல்லைப் பதற்றம் தொடர்பான முழுமையான விவரங்களை இதுவரை உறுதிப்படுத்தவில்லை என சர்வதேச ஊடகங்கள் செய்தி வெளியிட்டுள்ளன.
சீனப் படையினர் வழக்கமான ரோந்துப் பாதைகளிலிருந்து விலகிச் செயற்படும்போது, எல்லைப் பகுதிகளில் பதற்றம் ஏற்படுவதாக இந்திய வெளியுறவு அமைச்சின் பேச்சாளர் தெரிவித்துள்ளார்.
இந்தியா மற்றும் சீனாவுக்கு இடையிலான சுமார் 3 ஆயிரத்து 500 கிலோமீற்றர் நீளமான எல்லைப் பகுதியில் நீண்டகாலமாகத் தீர்க்கப்படாத எல்லைப் பிரச்சினை நிலவி வருகின்றமை குறிப்பிடத்தக்கது.
