நாட்டின் பத்து மாவட்டங்களில் நடத்தப்பட்ட ஆய்வில், 32 சதவீத குடும்பங்கள் தங்கள் உணவுத் தேவைகளைப் பூர்த்தி செய்ய கடன் வாங்குவதாகக் தெரியவந்துள்ளது.குறித்த தகவலானது உணவு சார்ந்த தகவல் மற்றும் செயல் வலையமைப்பு நடத்திய ஆய்வில் தெரியவந்துள்ளது. இந்த ஆய்வை நிறுவனத்தின் ஆராய்ச்சி அதிகாரி ஷெஹாரி விஜேசிங்க நடத்தினார்.
இந்த கணக்கெடுப்பு கடந்த ஆண்டு (2024) மே, ஜூன் மற்றும் ஜூலை மாதங்களில் நடாத்தப்பட்டது.
மன்னார், மட்டக்களப்பு, முல்லைத்தீவு, பதுளை, இரத்தினபுரி, காலி, நுவரெலியா, கொழும்பு, அனுராதபுரம் மற்றும் புத்தளம் ஆகிய மாவட்டங்களில் உள்ள 20 பிரதேச செயலாளர் பிரிவுகளை உள்ளடக்கி இந்த கணக்கெடுப்பு நடத்தப்பட்டது.
கொழும்பு மாவட்டத்தில் உள்ள கொலன்னாவ மற்றும் மஹரகம பிரதேச செயலாளர் பிரிவுகள் இந்த கணக்கெடுப்புக்காக தேர்ந்தெடுக்கப்பட்டன. இதில் 62 சதவீதம் பேருக்கு நிலையான வருமான ஆதாரம் இல்லை என்பதும், கிட்டத்தட்ட 57 சதவீதம் பேருக்கு உணவுப் பாதுகாப்பு இல்லை என்பதும் தெரியவந்தது.
இந்த மாதிரியில் 35 சதவீத வீட்டு உரிமையாளர்களின் மாத வருமானம் 49,000 ரூபாவுக்கும் குறைவாக உள்ளது.
கணக்கெடுப்புக்குத் தேர்ந்தெடுக்கப்பட்ட மக்கள் தங்கள் வருமானத்தில் 42 சதவீதத்தை உணவுக்காகச் செலவிடுகிறார்கள், அதே நேரத்தில் 6 சதவீதம் மட்டுமே சுகாதாரத்திற்காக ஒதுக்கப்படுகிறது. மேலும், கல்விக்காக 9 சதவீதம் ஒதுக்கப்படுகிறது.
கணக்கெடுக்கப்பட்ட குழுவில் 31.7 சதவீதம் பேர் உணவு வாங்க கடன் வாங்கியுள்ளதாகவும், தங்க நகைகளை அடகு வைப்பதன் மூலமோ, தங்களிடம் இருந்த சொத்துக்களை விற்பதன் மூலமோ அல்லது கடன் வாங்குவதன் மூலமோ உணவுக்கான பணத்தை தேடுவதாகவும் கண்டுபிடிக்கப்பட்டுள்ளது.
