கனேடிய அரசாங்கம் சிறு வணிக உரிமையாளர்களுக்கு மகிழ்ச்சியான செய்தியொன்றை அறிவித்துள்ளது.
சிறிய தொழில்களுக்கான கடன் அட்டை பரிவர்த்தனை கட்டணத்தை குறைப்பதற்கான புதிய நடவடிக்கைகள் வரும் அக்டோபர் 19 முதல் அமலுக்கு வரும் என்று கனேடிய அரசு அறிவித்துள்ளது.
90 சதவிகிதத்திற்கும் மேற்பட்ட சிறிய மற்றும் நடுத்தர அளவிலான தொழில்கள், இந்த குறைக்கப்பட்ட கட்டணத்தால் பயனடையும் என எதிர்பார்க்கப்படுகிறது.
கடன் அட்டை பரிவர்த்தனை கட்டணங்கள் 27 சதவிகிதம் வரை குறைக்கப்படும் என தெரிவிக்கப்பட்டுள்ளது.
இந்த கட்டணக் குறைப்பின் மூலம் சில தகுதியான சிறு வணிகங்கள் ஐந்து ஆண்டுகளில் சுமார் 1 பில்லியன் டொலர்கள் வரை சேமிக்கும் என்று எதிர்பார்க்கப்படுகிறது.
பணம் செலுத்தும் செயலிகள் உட்பட கிரெடிட் கார்டு தொழில்துறையின் அனைத்து உறுப்பினர்களும் இந்த சேமிப்புகளை நேரடியாக சிறு வணிகங்களுக்கு அனுப்ப வேண்டும் என்று கனேடிய அரசு எதிர்பார்க்கிறது.
கனேடிய நுகர்வோருக்கு வழங்கப்படும் வெகுமதி புள்ளிகளையும் பாதுகாக்கும் Visa மற்றும் MasterCard நிறுவனங்களுடன் கனேடிய அரசு பேச்சுவார்த்தை நடத்தி புதிய ஒப்பந்தங்களை இறுதி செய்துள்ளது.
குறைக்கப்பட்ட கிரெடிட் கார்டு பரிவர்த்தனை கட்டணம் ஒவ்வொரு ஆண்டும் சிறு வணிகங்களுக்கு ஆயிரக்கணக்கான டொலர்களை மிச்சப்படுத்தும்.
உதாரணமாக, ஒரு கடை 3,00,000 டொலர் மதிப்புள்ள பரிவர்த்தனைகளைச் செயலாக்கினால், தற்போதைய கட்டணத்திற்கு குறைந்தது 4,000 டொலர்கள் செலவாகின்றன. ஆனால, இந்த புதிய ஒப்பந்தங்கள் மூலம், அந்தக் கடை ஆண்டுக்கு 1,080 டொலர் வரை சேமிக்க வாய்ப்புள்ளது.
சிறிய தொழில்கள் துவங்க, வளர, மற்றும் முன்னேற உதவுவதற்காக கனடா அரசு பல நடவடிக்கைகளை எடுத்துவருகிறது.
2022-ஆம் ஆண்டின் பட்ஜெட்டில் சிறிய தொழில்களுக்கான வரி குறைப்பில் இருந்து கிடைக்கும் ஆதரவுகள் இன்று சிறிய தொழில்களுக்குப் பெரிதும் உதவுகின்றன.
