தையிட்டி விகாரையை இடிப்பதன் மூலம் பிரச்சினைக்குத் தீர்வு காணவே முடியாது.!

“யாழ். தையிட்டி விகாரையை உடைப்பதன் மூலம் பிரச்சினைக்குத் தீர்வு வருமா என்பது கேள்விக்குறியே. ஆகவே, சுமுகமான தீர்வை எட்ட வேண்டுமே தவிர மீண்டும் இனவாதத்தையும் மதவாதத்தையும் வளர்க்கக்கூடிய நடவடிக்கையை முன்னெடுக்கக் கூடாது.” – இவ்வாறு கடற்றொழில் அமைச்சர் இராமலிங்கம் சந்திரசேகர் தெரிவித்தார்.

யாழ்ப்பாணம் மாவட்ட செயலகத்தில் நேற்று திங்கட்கிழமை நடைபெற்ற நிகழ்வொன்றில் பங்கேற்ற பின்னர் ஊடகவியலாளர்களின் கேள்விக்குப் பதில் அளிக்கும்போதே அவர் மேற்கண்டவாறு கூறினார்.

அவர் மேலும் தெரிவிக்கையில்,

“யாழ்ப்பாணத்தில் இருக்கின்ற ஐந்து இலட்சத்துக்கும் அதிகமான மக்களுடைய விருப்பம் என்னவென்பதை நாங்கள் பார்க்க வேண்டும். அந்தவகையில் பன்சல கட்டி முடிக்கப்பட்டிருக்கின்றது. அதில் பூஜை வழிபாடுகளும் தொடர்கின்றன. அன்றைய தினம் பேசாதவர்கள், நடவடிக்கை எடுக்காதவர்கள் இன்றைக்கு இதனைப் பூதாகரமான பிரச்சினையாக மாற்றுவதற்கு முயல்கின்றனர்.

உண்மையிலேயே இதனை இதயசுத்தியுடன் செய்கின்றார்களா அல்லது எதிர்வரும் நாட்களில் இவர்கள் உள்ளூராட்சி சபைத் தேர்தலில் இதனைத் துருப்புச்சீட்டாகப் பயன்படுத்த முயல்கின்றார்களா என்ற கேள்வி எழுகின்றது.

மீண்டும் இனவாதத்தைத் தூண்ட முடியாது. இனவாதத்தைப் பயன்படுத்தி இலங்கையைப் பிளவுபடுத்த முடியாது. நாட்டின் அபிவிருத்தியைப் பற்றி பேச முடியாது. அபிவிருத்தி துரிதமாக முன்னெடுக்கப்படுகின்றது. இந்தநிலையில் அவர்கள் இனவாத, மதவாதத்தைத் தூண்டி மீண்டும் தங்களை நிலைநாட்டிக்கொள்ள சிலர் முயல்கின்றனர். எங்கள் அரசின் கீழ் இந்தப் போராட்டங்கள் இடம்பெறுகின்றன.

இந்தப் பிரச்சினைக்கு நாங்கள் மக்களோடு கலந்துரையாடி தீர்வை எட்ட முயல்கின்றோம்.

விகாரை சட்டவிரோதமா அல்லது சட்ட ரீதியானதா என்பதை வாதங்களாகத் தனித்தனியான கருத்துக்களைச் சொல்ல முடியும். விகாரை அமைக்கப்பட்ட இடம் மக்களுடைய இடம் என்பதில் மாற்றுக் கருத்துக்கு இடமில்லை. அந்தவகையில் நிச்சயமாக அந்த மக்களுக்கு அதற்குரிய நட்டஈடு மற்றும் மாற்றுக் காணிகளை வழங்க வேண்டிய தேவை இருக்கின்றது.

விகாரையை உடைப்பதன் மூலம் தையிட்டிப் பிரச்சினைக்குத் தீர்வு வருமா என்பது கேள்விக்குறியே. ஆகவே, சுமுகமான தீர்வை எட்ட வேண்டுமே தவிர மீண்டும் இனவாதத்தையும் மதவாதத்தையும் வளர்க்கக்கூடிய நடவடிக்கையை முன்னெடுக்கக் கூடாது.” – என்றார்.