12 மாவட்டங்களை மையப்படுத்தி தட்டம்மை தடுப்பூசி போடும் நிகழ்வு, இன்று (09) நடைபெறவுள்ளது. இளைஞர் சமூகத்தை இலக்கு வைத்து இந்த வேலைத்திட்டம் நடைமுறைப்படுத்தப்படுவதாக, தொற்றாநோய் பிரிவின் சமூக வைத்திய நிபுணர் அதுல லியபத்திரன தெரிவித்தார்.
இதற்கமைய, 20 வயது முதல் 30 வயது வரை உள்ளவர்கள், தட்டம்மை தடுப்பூசி மருந்தை அருகில் உள்ள சுகாதார அலுவலர் அலுவலகத்தில் இன்று பெற்றுக் கொள்ளலாம் என்றார்.
அத்துடன் எதிர்வரும் 4 வாரங்களுக்கு இந்தத் திட்டம் முன்னெடுக்கப்பட உள்ளது.
9 வயது முதல் 19 வயது வரையிலான தட்டம்மை தடுப்பூசியை முறையாகப் பெற்றவர்களும் ஒரு டோஸ் தடுப்பூசியைப் பெற முடியும் என்றும் மருத்துவர் குறிப்பிட்டார்.
நாட்டிலிருந்து முற்றாக ஒழிக்கப்பட்ட அம்மை நோய் மீண்டும் பரவும் அபாயம் காணப்படுவதாக சுகாதாரத் திணைக்களம் சுட்டிக்காட்டியுள்ளது. இதையடுத்து, தடுப்பூசி போடும் திட்டம் தொடங்கப்பட்டுள்ளது.
கடந்த ஆண்டு மே மாதம் முதல் இலங்கையில் பதிவான தட்டம்மை நோயாளர்களின் எண்ணிக்கை 1,100 ஆகும்.
