பொலன்னறுவை பகுதியொன்றில் காட்டு யானை தாக்கி மூதாட்டி ஒருவர் உயிரிழந்திருப்பதாக மனம்பிட்டிய பொலிஸார் தெரிவித்துள்ளனர்.
இச் சம்பவம் நேற்றையதினம் (04-11-2024) அதிகாலை இடம்பெற்றுள்ளது. குறித்த சம்பவத்தில் உயிரிழந்தவர் பொலன்னறுவை, செவனபிட்டிய பிரதேசத்தைச் சேர்ந்த 71 வயதுடைய மூதாட்டி என தெரியவந்துள்ளது.
இது தொடர்பில் மேலும், தெரியவருவதாவது,
உயிரிழந்த மூதாட்டி தனது வீட்டிற்கு அருகில் சிறிய கடை ஒன்றை நடாத்தி வந்துள்ள நிலையில் நேற்று தனது கடையில் உறங்கிக் கொண்டிருந்துள்ளார். இதன்போது கடையை உடைத்துக் கொண்டு உள்நுழைந்த காட்டு யானை ஒன்று மூதாட்டியை பலமாக தாக்கியுள்ளது.
இதனையடுத்து படுகாயமடைந்த மூதாட்டி சம்பவ இடத்திலேயே உயிரிழந்துள்ளதாக பொலிஸார் தெரிவித்தனர்.
