இலங்கை போக்குவரத்து சபைக்குச் சொந்தமான பேருந்தும் வானொன்றும் நேருக்கு நேர் மோதி விபத்துக்குள்ளானதில், வானின் சாரதி படுகாயமடைந்துள்ளார்.
கொழும்பு- ஹட்டன் பிரதான வீதியில் ஸ்கேடன் தோட்ட பகுதியில் இன்று செவ்வாய்க்கிழமை (12) பிற்பகல் 2 மணியளவில், இடம்பெற்ற இந்த விபத்தில் படுகாயமடைந்த சாரதி, வட்டவளை வைத்தியசாலையில் அனுமதிக்கப்பட்டதன் பின்னர், மேலதிக சிகிச்சைகளுக்கான நாவலப்பிட்டிய வைத்தியசாலைக்கு மாற்றப்பட்டுள்ளார்.
ஹட்டனிலிருந்து கொழும்பு நோக்கி பயணித்த இலங்கை போக்குவரத்து சபைக்குச் சொந்தமான பேருந்திற்கு எதிர் திசையில், கினிகத்ஹேனவில் இருந்து ஹட்டன் நோக்கி அதிவேகத்தில் பயணித்த வானானது முன்பாக பயணித்த முச்சக்கரவண்டியை, முறைக்கேடான முறையில் முந்திச்செல்வதற்கு முயன்ற போதே எதிரே வந்த பேருந்துடன் மோதியதில் இவ்வனர்த்தம் ஏற்பட்டுள்ளது.
பேருந்துக்கும், வானுக்கும் பலத்த சேதம் ஏற்பட்டுள்ளது எனத் தெரிவித்த ஹட்டன் போக்குவரத்துப் பொலிஸார் மேலதிக விசாரணைகளை மேற்கொண்டு வருகின்றனர்.
