கொக்கைன் போதைப்பொருளுடன் சியேரா லியோன் பிரஜை உட்பட நான்கு சந்தேக நபர்கள் கைது செய்யப்பட்டுள்ளதாக பொலிஸ் போதைப்பொருள் தடுப்பு பிரிவினர் தெரிவித்தனர்.
இது தொடர்பில் தெரியவருவதாவது,
காலி பின்னதுவ பிரதேசத்தில் சந்தேகத்திற்கிடமான முறையில் பயணித்த கார் ஒன்றில் மேற்கொள்ளப்பட்ட சோதனையில் 279 கிராம் கொக்கைன் போதைப்பொருளுடன் இரண்டு சந்தேக நபர்கள் பொலிஸாரால் கைது செய்யப்பட்டுள்ளனர்.
24 மற்றும் 32 வயதுடைய இருவரே இவ்வாறு கைது செய்யப்பட்டுள்ளனர்.
கைது செய்யப்பட்ட இரு சந்தேக நபர்களிடம் மேற்கொள்ளப்பட்ட விசாரணையில், சந்தேக நபர்களுக்கு கொக்கைன் போதைப்பொருளை விற்பனை செய்ததாகக் கூறப்படும் சியேரா லியோன் பிரஜை ஒருவர் பொரளை பிரதேசத்தில் வைத்து கைது செய்யப்பட்டுள்ளார். கைது செய்யப்பட்ட சியேரா லியோன் பிரஜையிடமிருந்து 672 கிராம் கொக்கைன், 500 அமெரிக்க டொலர்கள் மற்றும் வெளிநாட்டு நாணயத்தாள்கள் என்பன கைப்பற்றப்பட்டுள்ளன.
இதேவேளை, இந்த போதைப்பொருள் கடத்தலுடன் தொடர்புடைய மற்றுமொரு சந்தேக நபரும் 04 கிராம் 70 மில்லிகிராம் கொக்கைன் போதைப்பொருளுடன் பொலிஸாரால் கைது செய்யப்பட்டுள்ளார்.
கைது செய்யப்பட்டவர் பொரளை பிரதேசத்தில் வசிக்கும் 28 வயதுடையவர் ஆவார்.
இது தொடர்பான மேலதிக விசாரணைகளை பொலிஸ் போதைப்பொருள் தடுப்பு பிரிவினர் மேற்கொண்டு வருகின்றனர்.
