கல்கிஸ்ஸை பிரதேசத்தில் மேற்கொள்ளப்பட்ட இரு சுற்றிவளைப்பு நடவடிக்கைகளின் போது ஐஸ் போதைப்பொருள் மற்றும் துப்பாக்கியுடன் இரண்டு சந்தேக நபர்கள் நேற்று திங்கட்கிழமை (28) கைது செய்யப்பட்டுள்ளதாக கல்கிஸ்ஸை பொலிஸார் தெரிவித்தனர்.
அதன்படி, கல்கிஸ்ஸை பொலிஸ் பிரிவுக்கு உட்பட்ட இரத்மலானை பகுதியில் ஐஸ் போதைப்பொருள் மற்றும் ரிவோல்வர் ரக துப்பாக்கியுடன் சந்தேக நபர் ஒருவர் கைது செய்யப்பட்டுள்ளார்.
இவர் இரத்மலானை பிரதேசத்தைச் சேர்ந்த 33 வயதுடையவர் ஆவார்.
கைது செய்யப்பட்ட சந்தேக நபரிடம் இருந்து 800 மில்லி கிராம் ஐஸ் போதைப்பொருள், மொரட்டுவை பிரதேசத்தில் உள்ள வீடொன்றில் மறைத்து வைக்கப்பட்டிருந்த வெளிநாட்டில் தயாரிக்கப்பட்ட ரிவோல்வர் ரக துப்பாக்கி ஒன்றும் பொலிஸாரால் கைப்பற்றப்பட்டுள்ளது.
இதேவேளை , கல்கிஸ்ஸை பொலிஸ் பிரிவுக்கு உட்பட்ட பகுதியில் ஐஸ் போதைப்பொருளுடன் மற்றொரு சந்தேக நபர் நேற்று (28) கல்கிஸ்ஸை பொலிஸாரால் கைது செய்யப்பட்டுள்ளார்.
கைது செய்யப்பட்டவர் லுனாவ பிரதேசத்தை சேர்ந்த 54 வயதுடையவர் ஆவார்.
சந்தேக நபரிடம் இருந்து 12 கிராம் 630 மில்லிகிராம் ஐஸ் போதைப்பொருள் பொலிஸாரால் கைப்பற்றப்பட்டது.
இது தொடர்பான மேலதிக விசாரணைகளை கல்கிஸ்ஸை பொலிஸார் மேற்கொண்டு வருகின்றனர்.
