வடக்கில் தமிழ்த் தேசிய அரசியல் எனும் போர்வையில் சுயநலம் பேணும் தலைவர்களிடம் ஏமாறாதீர்கள்.!

கடந்த காலங்களில் தமிழ்த் தேசிய அரசியல் என்ற போர்வையில் மக்களை உணர்ச்சிவசப்பட வைத்து, வாக்குகளைப் பெற்றுத் தங்களது சுயநல அரசியல் தேவைகளைப் பூர்த்தி செய்துகொண்ட ஏமாற்று அரசியல்வாதிகளின் வெற்று முழக்கங்களை நம்பி மக்கள் இனிமேலும் ஏமாறக் கூடாது என்று மக்கள் விடுதலை முன்னணியின் பொதுச்செயலாளர் ரில்வின் சில்வா தெரிவித்தார்.

யாழ்ப்பாணத்தில் நேற்று சனிக்கிழமை தேசிய மக்கள் சக்தியின் மாவட்ட உத்தியோகபூர்வ அலுவலகத்தைத் திறந்து வைத்த பின்னர், ஊடகங்களுக்குக் கருத்துத் தெரிவிக்கும்போதே அவர் இவ்வாறு கூறினார்.

வழமையான தமிழ் அரசியல் தலைமைகள் வட பகுதி மக்களின் உண்மையான அடிமட்டப் பிரச்சினைகளைத் தீர்க்கத் தவறிவிட்டனர் என்றும் ரில்வின் சில்வா குற்றம் சாட்டினார்.

அவர் மேலும் தெரிவிக்கையில்,
“தமிழ்த் தேசியவாதம் பேசும் தலைவர்கள் வட பகுதி மக்களின் உண்மையான வாழ்வாதாரப் பிரச்சினைகளுக்கோ, படித்த இளைஞர் – யுவதிகளின் வேலைவாய்ப்புப் பிரச்சினைகளுக்கோ அல்லது பிராந்தியத்தின் பொருளாதார மேம்பாட்டுக்கோ எந்தவொரு நிலையான தீர்வையும் இதுவரை பெற்றுத்தரவில்லை. அவர்கள் மக்களைத் தேர்தல் காலத்தில் மட்டும் உணர்ச்சிவசப்பட வைத்து சுயலாபம் தேடிக்கொண்டனர்.

தென்னிலங்கையைத் தொடரும் அரசியல் கலாச்சார மாற்றம்
இலங்கையின் ஒட்டுமொத்த அரசியல் கலாச்சாரமும் தற்போது நேர்மறையான திசையை நோக்கி மாற்றமடைந்து வருகின்றது.

தென்னிலங்கை மக்கள் ஊழலற்ற, நேர்மையான, மக்கள் நலனை முதன்மையாகக் கொண்ட ஒரு புதிய அரசியல் பயணத்தைத் தேசிய மக்கள் சக்தியோடு இணைந்து தொடங்கியிருக்கின்றார்கள். அதே மாற்றத்தையும், புதிய அரசியல் யுகத்தையும் வடக்கு மண்ணிலும் உருவாக்க வேண்டிய பொறுப்பு இங்குள்ள தமிழ் மக்களுக்கும் இருக்கின்றது.

தேசிய மக்கள் சக்தி இன, மத, மொழி பேதங்களுக்கு அப்பால், நாட்டின் அனைத்துக் குடிமக்களுக்கும் சமத்துவமான உரிமைகளையும், சமூக நீதியையும் பெற்றுக்கொடுப்பதில் உறுதியாக இருக்கின்றது.

யாழ்ப்பாணம் மாவட்டத்தின் பாரம்பரிய தொழில்களான விவசாயம், மீன்பிடி மற்றும் பிராந்தியத்தின் கல்வித்துறை சார்ந்த உள்கட்டமைப்புகளை மேம்படுத்துவதற்கு விசேட கவனம் செலுத்தப்படும்.

இப்பகுதி மக்களின் வாழ்வாதாரத்தை உயர்த்துவதற்கான தெளிவான, நடைமுறைச் சாத்தியமான பொருளாதாரத் திட்டங்களை எமது கட்சி நாடாளுமன்றத்தில் தொடர்ச்சியாக முன்வைத்து வருகின்றது.

எனவே, எதிர்காலச் சந்ததியின் வாழ்வு சிறக்கவும், தூய்மையான அரசியல் சூழல் வடக்கிலும் மலரவும் யாழ். குடாநாட்டு மக்கள் தேசிய மக்கள் சக்திக்குத் தங்களது பேராதரவைத் தொடர்ந்து வழங்க வேண்டும்.

அத்துடன், இலங்கையில் நீண்டகாலமாகப் பிற்போடப்பட்டு வரும் மாகாண சபைத் தேர்தலை அடுத்த ஆண்டே நடத்தக் கூடிய சாதகமான சூழ்நிலை காணப்படுகின்றது என்று தெரிவித்தார்.

இந்த ஆண்டுக்கான வரவு – செலவுத் திட்டத்தில் மாகாண சபைத் தேர்தலை நடத்துவதற்காக நிதி ஒதுக்கப்பட்டிருந்ததை நினைவூட்டிய ரில்வின் சில்வா, எதிர்பாராத அனர்த்தமே அதனைத் தாமதப்படுத்தியது என்றும் கூறினார்.

இது தொடர்பில் அவர் மேலும் தெரிவிக்கையில்,
“அண்மையில் நாட்டைத் தாக்கிய ‘டித்வா’ சூறாவளிப் புயல் காரணமாக நாட்டின் பல பகுதிகளும், மக்களும் கடுமையாகப் பாதிக்கப்பட்டனர். இதனால், பாதிக்கப்பட்ட மக்களின் அவசர நிவாரணப் பணிகள் மற்றும் வீட்டு மறுசீரமைப்புகளுக்காகத் தேர்தலுக்கு ஒதுக்கப்பட்டிருந்த நிதியிலிருந்து 500 பில்லியன் ரூபாவை உடனடியாக ஒதுக்க வேண்டிய தார்மீகச் சூழ்நிலை அரசுக்கு ஏற்பட்டது.

இந்த நிதித் திசைதிருப்பல் காரணமாகவே, திட்டமிட்டபடி இந்த ஆண்டில் தேர்தலை நடத்த முடியாமல் போனது.

முன்னாள் ஜனாதிபதி ரணில் விக்கிரமசிங்கவின் ஆட்சிக்காலத்தில் மாகாண சபைத் தேர்தலை நடத்துவதற்காகக் கொண்டுவரப்பட்ட எல்லை நிர்ணயம் உள்ளிட்ட சில சட்ட நடைமுறைகளில் கடுமையான சிக்கல்கள் தோற்றுவிக்கப்பட்டன.

தற்போது இந்தச் சட்டச் சிக்கல்களைத் தீர்த்து, தேர்தலை நடத்துவதற்கான உகந்த வழியைக் கண்டறிவதற்காக விசேட நாடாளுமன்றக் குழு ஒன்று அமைக்கப்பட்டுள்ளது.

இந்தக் குழுவின் அறிக்கை விரைவில் கிடைக்கப் பெறவுள்ளதுடன், அதனை நாடாளுமன்றத்தில் பரிசீலித்து உரிய திருத்தங்களை மேற்கொண்ட பின்னர் அடுத்த ஆண்டளவில் மாகாண சபைத் தேர்தலைத் திட்டவட்டமாக நடத்த முடியும் என எதிர்பார்க்கின்றோம்.” – என்றார்.

மாகாண சபைத் தேர்தலை விரைந்து நடத்துமாறு அண்டை நாடான இந்தியா தரப்பிலிருந்து ஏதேனும் இராஜதந்திர அழுத்தங்கள் பிரயோகிக்கப்படுகின்றதா என ஊடகவியலாளர்கள் எழுப்பிய கேள்விக்கு அவர் பின்வருமாறு பதிலளித்தார்.

“மாகாண சபைத் தேர்தலை நடத்துவது தொடர்பாக இந்திய அரசிடமிருந்து எமது அரசுக்கு எந்தவிதமான அழுத்தங்களும் விடுக்கப்படவில்லை. தற்போதைய இந்திய அரசுக்கும், எமது புதிய அரசுக்கும் இடையில் மிகவும் இணக்கமான, நட்புறவான மற்றும் ஆரோக்கியமான இருதரப்புப் புரிந்துணர்வு நிலவி வருகின்றது.” – என்றார்.